علقت الإعلامية سهير جودة، على إثارة الجدل التي تسبب فيها المسلسل الوثائقي للأمير هاري وزوجته ميجان ماركل، والذي يعرض حاليا عبر إحدى المنصات العالمية، قائلة: «في تساؤلات كثيرة جدًا على السوشيال ميديا، هل ميجان شبه ديانا، وهل ميجان حبيبة حقيقية وقصة حب بجد، ولا فيها إدعاء وبحث عن بطولة ومجد شخصي، هاري وميجان مسلسل وثائقي لكن عامل جدل كبير في العالم كله».

وأضافت سهير في برنامجها الذي يحمل اسم «الستات»، والمذاع عبر فضائية «النهار»، قائلة: «في غضب كبير من البريطانيين ومن القصر، لأنهم شايفين محاولة لتمزيق التقاليد الملكية العائلية.. ايه هو الجديد اللي بيقدمه العمل الوثائقي؟  والانتقاد الكبير من الانجليز بيقول: ليه كنتوا بتهربوا من الصحافة وعايزين خصوصية ودلوقتي بتبيعوا خصوصياتكم بـ100 مليون دولار، وبتكشف أسرار عيلتك وتسخر من القصر».

وأشارت سهير جودة: «ميجان دي شخصية غريبة جدا، احنا تعاطفنا معاها في الأول عشان هي بنت عادية وبتتجوز الأمير، والأمير بيحبها، وأنا بشوف إنها ممثلة متواضعة جدًا، ومش شايفة أنها ضحت بحاجة، واللي اختارته عشان الحب مينفعش تتاجر وتساوم بيه دلوقتي وتقولي أنا سبت وسبت عشانه».

وتابعت سهير: «لو كانت هي مشاعر حقيقة مش هتحتاج تعمل الضجة دي كلها لأنها إتجوزت الأمير و اتنازل عن القابه  الملكية عشانها.. إيه اللي بتحاول توصل له بكل البكائيات دي؟ مجد شخصي؟ قبل ما بتدخل اي مكان بتبقى عارف تقاليد.. طالما اخترت كن قد اختيارك! ».