ننشر نص تحقيقات نيابة شرق القاهرة الكلية في واقعة مقتل طالب على يد ضابط شرطة بقسم شرطة السلام، وفي الحلقة الثانية ننشر أقوال المتهم  بحيازة حشيش. 

> اسمك وسنك وعنوانك وجهة عملك؟
- اسمي محمود أحمد السيد، 25 سنة، عامل بمحل قطع غير سيارات.
> ما قولك في ما هو منسوب إليك من أنك متهم بأحراز جوهر مخدر الحشيش بقصد الاتجار بدون ترخيص وفي غير الأحوال المصرح بها قانونًا والتعدي على النقيب محمد عادل محمود فؤاد، والنقيب أسامة  محمد محمد إبراهيم، واستعمال القوة والعنف معهما بصفتهما موظفين عمومين؟
- ماحصلش.
> ما الذي حدث وما ظروف ضبطك وإحضارك؟
- اللي حصل أنا كنت قاعد على قهوة جنب بيت معتز، وكان معانا ناس أصحابنا علشان نتفرج علي  ماتش، وقاعدين عادي لقيت ميكروباص وقف ونزل منه ضابط شرطة، وقال ليّا إنت بترمي إيه في الأرض، وطلع كشاف الموبايل وقعد يدور في الأرض مالاقاش حاجة، فقام مفتشني مالاقاش حاجة معايا، وكان عاوز ياخدني يركبني ميكروباص، فمعتز بيقول له إنت هتاخده ليه؟ فضربه في صدره، فقال له إنه محامي وإنّي مش معايا حاجة، ومش من حقة ياخدني، فراح زقّه تاني وحاول يدخلني العربية، وجِه ورايا، وأخته جَت تكلم الضابط فقام ضربهم وزقهم وشتمهم، والضابط محمد فؤاد نزل من العربية، وساعتها الناس اتلمت، فطلع السلاح بتاعه وضرب نار على  الناس اللي واقفة علشان يبعدهم عن العربية، وضرب 3 طلقات، منها واحدة  في الهواء، وواحدة جَت في تامر، والثانية جَت في واحد اسمه سيف، والضابط لما شاف العيال وقعت خد الأمناء وجري بيهم بسرعة، وأنا كنت في  الميكروباص ودخلت معاهم القسم، وفي الفجر جَت النيابة وعرفت اللي حصل وإن فيه واحد مات.
.. وحيث قمنا بفض الحرز عبارة عن مظروف أبيض وبداخله كيس بلاستك وبداخله قطعة حشيش، أنكر المتهم صلته بالمخدر.