حرص الإعلامي أسامة كمال، على إبراز تعليق مشاهد انتقده على موقع تويتر بسبب رأيه في الرئيس الراحل جمال عبد الناصر.

وقال كمال خلال مقدمة برنامجه "مساء dmc": "امبارح في بداية الحلقة نقلت مقولة لجمال عبد الناصر واللي قلت إن ليه انجازات كبيرة للوطن، ولأنه بشر فليه اخفاقاته زي ما له انجازاته".

وتابع كمال قائلا: "بعض الناس مش عارف ليه زعلت من كلامي، والغريب إنهم مش اللي طبيعي بيزعلوا لما أقول ناصر كان ليه اخفاقاته لأنه بشر، لكن لأني قلت إن ليه انجازاته".

وتابع كمال، أن المشاهد كتب له على تويتر؛ "مع احترامى لك فأنت لم تعاصر عبد الناصر فى شبابك، ضابط شاب ليس لدية خبرة فدمر الانسان ودمر الاقتصاد ودمر الزراعة ودمر الصناعة وطرد الاجانب واليهود المصريين ودمر التجارة وهذا هو مصيرنا ارتفاع نسبة الامية وقري ومدن يعيشون وسط الزبالة والفقر منتشر.. عايز تعرف المصريين عايشين ازاي اذهب الى القرى والمدن الصغيرة لترى بعينك الفقر والجهل والخوف فى عيونهم".

من جانبه رد أسامة كمال على المشاهد قائلا: "سيدي الفاضل من حقك تختلف ومن حقك تقول وكمان ننقل عنك ونختلف ونتفق معاك.. عايزك ماتنساش مشروع مصر سنة 47 كان محاربة الحفا، ولو ماكانش الحفا ظاهرة عامة ما كانش اتعملتله حملة.. يعني كنا حافيين في قرانا والأمية منتشرة أكتر، كنا لازم نحاربها طبعاً ومجانية التعليم اللي كان بدأها د. طه حسين استكملت، ولو كانت النتايج بعد 50 أو 60 سنة غير مرضية أو سيئة، فدة لأننا كنا لازم نعدل في التجربة واحنا ماشيين".

وتابع كمال: "أنا مش ناصري ولا تابع لأي مدرسة باسم شخص وعشان كدة قلت إن ليه انجازاته اللي عايشة معانا النهاردة زي القناة والسد وغيرهم، وليه اخفاقاته لأنه بشر ولأننا لا يمكن نحكم على مرحلة برة ظروفها بعد 60 سنة.. نتذكر الظروف المحيطة ونتعلم الدروس ونمشي لقدام".