علق الفنان بيومى فؤاد على الاحتفال بمناسبة عيد الحب، قائلًا: "زمان قبل الفيس بوك وتويتر والانستجرام والحاجات دى كنا بنقضى الفلانتين فى البلكونة، نقف ضاربين الفانلة الحمالات إياها ونقعد نبصبص لبنت الجيران، والصايع اللى فينا هو اللى يعرف يخرج مع البت بتاعته من ورا أهله وأهلها، طبعًا الكلام ده وإحنا 17 سنة".

وأضاف خلال حلقته من برنامج "بيومى أفندي" المذاع عبر فضائية "DMC"، "دلوقتى خلاص، البنت بيبقى عندها 8 سنين وبتغير على صاحبها، علشان استلف الأستيكة من زميلتهم فى الفصل مش منها، والولد يبقى عنده 10 سنين قد ركبتى كده، وبيغير على صاحبته من مستر أمجد بتاع العربى اللى عنده 35 سنة ومتجوز ومخلف، وكوكى اللى عندها 7 سنين بنت طنط سعاد جارتنا كاتبة على الفيس بوك إنها منفصلة ودخلت تجربة وخانها الجبان، معرفش طبعًا إيه نوع الخيانة اللى ممكن تكون بين طفلين عندهم 7 سنين".

وتابع: "العلاقات اتطورت عن زمان، كان الواحد يا إما يتجوز واحدة أو يخطبها، بس فى عالم الفيس بوك الموضوع اختلف، يا إما معقدة زى مايكون ماسكين على بعض ذلل أو ضاربين بعض، أو علاقة مفتوحة يعنى الواحدة تبقى ماشية مع واحد وصحابه، أو ارتباط".