انتقد المخرج عمرو سلامة، الأشخاص الذين يدعون إلي توقف الفن أو توقف الفنانين عن تقديم أعمالهم بهدف دعم القضية الفلسطينية، وذلك بعد اعتذار محمد سلام عن حضوره عرض مسرحية «زواج اصطناعي» التي تعرض يوم 30 أكتوبر في السعودية.

كتب عمرو سلامة عبر حسابه بموقع اكس: «السينما مش أجور مستفزة لفنانين وفستان على سجادة حمرا، الطرف الآخر انتصر وبينتصر وكسب تعاطف العالم لانه تحكم في السردية العالمية، تحكم فيها بالفن أولا وثانيا وثالثا، الفن اللي أغرقه بقصصه وحكاياته، وقدر بيهم يتحكم في وعي العالم كله، وبعد الفن استخدم إعـ/ـلام وسياسة وس/ـلاح ورأس مال، بس كان وسيلته الأهم الفن».

وأضاف عمرو سلامة:«السينما والفن صناعة 10 في المية من العاملين فيها بياخدوا أجور عالية نسبيا آه، ولكن 90% من العاملين فيها ناس بتجري على أكل عيشها وعايشة بالكاد، لو توقف الفن الناس ديه هتجوع مش هتدفع أقساطها ومش هتاكل عيالها،ماينفعش تروح لراجل في مصلحة حكومية وتقوله امضي لي ورقة فيقولك مش قادر بسبب أحداث سياسية دمـوية مأثرة عليا، ماينفعش تقول لميكانيكي صلحلي العربية يقولك مش قادر صور الدمـار مأثرة فيها، هو آه اسمه ترفيه بس هو صناعة، طالما مانتاش ماسك ســلاح بتحارب العدو في أرض المعـركة دورك تشتغل وتعمل دورك في المجتمع، لأن ده أكل عيشك وأكل عيش ناس كثير غيرك».

وأضاف سلامة: «لو عند أي حد رفاهية عدم الشغل وهو مكتئب هيبقى مفيد يريح ويهتم بصحته النفسية، لكني أشعر بس كمان إن علنية المواقف ممكن تئذي ناس كثير غيره وتحط عليهم ضغط لا يستحقوه،وكل خوفي يكون الفنان نفسه مش مقدر فنه، وعنده صوت داخلي جواه مستهيف الفن أو مستحرمه أو مستحقره، لإن لو الفنان نفسه شايف الفن كده فده يبرر ليه شريحة كبيرة من الناس شايفه الفن كده، رقص وهلس وعري وفلوس ع الأرض وشكرا،الفن في رأيي عمل زي أي عمل، ويضاف عليه إنه قادر على تشكيل وعي البشرية، قادر إنه يطبب عليهم في وقت صعب، قادر إنه يخلينا كإنسانية نفهم بعض أكثر».

اختتم عمرو سلامة حديثه مؤكدا أنه لا يقصد الهجوم على شحص يعينه، قائلا:«أنا كلامي أقسم بالله مش نيته مهاجمة حد خصوصا لو حد بحبه ولا الدفاع عن حد، هو دفاع عن مهنة فاتحة بيتي، ومهنة بتعطيني سبب للحياة، ومهنة أنا في منظوري شايفها نبيلة، ولو ماكنتش شايفها كده ماكنتش هشتغلها».