" اللحمة بقت غالية ومش عارفين ناكلها " هكذا عبر كثير من المواطنين عن غضبهم من ارتفاع أسعار اللحوم ، حتى وصل سعر كيلو اللحم إلى 120جنيها.

"الهلال اليوم " رصدت أسعار اللحوم بأنواعها وجاءت كما يلى:" مخ بتلو 50 جنيها، ريش بتلو 90 جنيها، دوش ورقبة بتلو 75 جنيها، ضانى 95 جنيها، رقبة ضانى 85 جنيها، مفروم جاهز 90 جنيها، مخاصى ضانى 65 جنيها، مخاصى كندوز 80 جنيها، كباب حلة بتلو 125 جنيها، بفتيك بتلو 135 جنيها ، عصاعيص ضانى 45 جنيها ".

بينما وصلت أسعار " كفتة طرب 60 جنيها، همبورجر 50 جنيها، مفروم حواوشى 30 جنيها، كبيبة 50 جنيها، ممبار أرز 30 جنيها، كفته شيش 50 جنيها ، كفتة أرز 50 جنيها".

الجزارون : لحوم الحمير وارتفاع السعر وراء ضعف الإقبال

قال الحاج سلمان، جزار، 55 عاما:" الإقبال ضعيف على محلات الجزارة بشكل عام بسبب انتشار شائعة لحوم الحمير الموجودة في السوق، الناس بتخاف من كلام الإعلام والإنترنت ، وأنا ببيع بالجملة للمحلات الصغيرة، الكيلو بـ50 جنيها، والمحل يبيعه بـ 90جنيها للزبون، وباقي الكمية ببيعها للمواطنين بنفس السعر، وفيه إقبال على المحل بتاعي علشان الأسعار رخيصة عندى " .

وأضاف:" إشاعة لحوم الحمير سببت ضرر لناس كتير وخاصة محلات الكفتة والسوسيس والهبورجر والحواوشى واللحوم المفرومة، وبيحاولوا يخفضوا الأسعار علشان الناس تشترى منهم لكن مفيش فايدة، الناس تركت اللحمة وخايفة تاكل لحم حمير ".

وذكر الحاج رضوان،جزار، 58 عاما:" الإقبال ضعيف للغاية ، والمحل فاضي مفيش زباين، والزبون بييجى يسأل على السعر ويمشي مبيشتريش، والناس اتجهت للفراخ علشان توفر المصاريف، وفيه ناس اتجهت للحوم المستوردة، لكن اللى ربنا مقدره بيشترى مهما ارتفع السعر ".

وأوضح محمد السيد ، جزار، 42 عاما " بعد تعويم الجنيه وارتفاع سعر الدولار ارتفعت أسعار الأعلاف وأكل المواشي ، وده خلى سعر المواشي يرتفع، وكيلو اللحم وصل 120 جنيها، والزبون المقتدر بيشترى، لكن الزبون اللي مش مقتدر ممكن يشترى نص كيلو في الأسبوع، أو يلجأ للحوم المجمدة والمستوردة زي البرازيلى " .

ربات البيوت: الفراخ أوفر من اللحمة

قالت سعاد على، ربة منزل:" أسعار اللحوم ارتفعت، والستات بيشتروا الفراخ أوفر بكتير لأن الفرخة 2.5 كيلو ثمنها 70 جنيها مثلا أفضل من اللحمة، وفيه ستات بيشتروا اللحمة البرازيلى المستوردة " .

وذكرت أميمة إبراهيم ، ربة منزل:" أنا بطلت أشترى لحوم مفرومة ومجمدات علشان خايفة من لحمة الحمير ".

خبير اقتصادي : تفعيل الرقابة وضبط الأسواق

قال شريف الدمرداش الخبير الاقتصادي إن ارتفاع الأسعار بعد تعويم الجنيه ظاهرة طبيعية ، وقد انعكس هذا الارتفاع في الأسعار على جميع السلع سواء المستوردة منها أو المحلية، ومن ضمنها اللحوم، مشيرا الى أن ضعف الرقابة والفشل في السيطرة على الأسواق يؤدى إلى استغلال التجار للزبائن ومضاعفة الأسعار.

وأكد أن مواجهة ارتفاع الأسعار يكمن في تفعيل دور الرقابة على الأسواق ومعاقبة المخالفين وهذه مسئولية الأجهزة الرقابية كجهاز حماية المستهلك ومفتشي التموين .

وأوضح أن إيجاد أسواق ومنافذ بديلة كما تقوم به منافذ وسيارات القوات المسلحة، ومنافذ وزارة الزراعة، واللحوم السودانية التى تجلبها وزارة التموين تؤدى إلى توازن الأسواق .