ظهرت الفنانة حنان مطاوع، مع الإعلامية مني الشاذلي، في برنامجها المُذاع على قناة ON وكشفت حنان، خلال لقائها عن تفاصيل تعرضها لوعكة صحية تسببت في إزالة الغدة الدرقية، موضحة أنها من أصعب الفترات التي مرت بها في حياتها ومن أصعب التجارب، خاصة بعدما تم تشخصيها بصورة خاطئة في بداية إصابتها.

وقالت حنان مطاوع: "الحمد لله على كل شيء، أنا من حوالي أربعة أشهر ونصف عملت عملية الغدة الدرقية، وقبل العملية حالتي اتشخصت حاجة خطيرة جدًا، والمصيبة إن التشخيص مش من دكتور، والموضوع تضخم قبل ما نستشير الدكتور أو الجراح، ودخلنا في دوامة الوهم أنا وجوزي".

وأضافت حنان: "ارتبكت جدًا لدرجة إني بدأت أعمل مسح ذري، والأعراض كانت ضيق تنفس ولما يجيلي دور برد صوتي يتشرخ ويرجع بعد 4 أشهر، ورقبتي بقت عريضة جدًا غير دلوقتي، لأنهم شالوا منها نص كيلو تقريبًا، ولكن كتير قالولي إنتي عندك غدة درقية وأنا كنت بعمل وظائف وتطلع كويسة، واللي عملوا السونار دخلوني في نفق مظلم ووهم".

هذا وقد كشفت أيضاً حنان مطاوع، عن رد فعل زوجها، قائلة: "أنا بقيت مش شايفة حاجة في الدنيا غير بنتي أماليا، ومرتبكة جدًا، أمير، جوزي عمل معايا نفس المشهد بتاعي مع هند صبري، في حلاوة الدنيا، وطلع من غرفة الكشف كلم كل الدكاترة في العيلة، وبعت لهم صور السونار وسألهم يعمل إيه، ودخل عندي وشه لونه أزرق وفهمت من أدائه إني مش كويسة".

واستكملت حنان: "الحمد لله طبعًا وربنا يشفي كل مريض، هي كانت تجربة وحشة أوي، وطول الوقت بحمد ربنا وشاكرة طول الوقت، ومتمنية إني أعيش علشان أبقى مع بنتي أماليا".

وقد أشارت حنان مطاوع، إلى أنها بالفعل كتبت وصيتها قبل دخولها غرفة العمليات لإجراء عملية إزالة الغدة الدرقية، قائلة: "أنا كاتبة وصيتي من وأنا صغيرة زي ما وصانا الرسول صلى الله عليه وسلم، ولكن كل فترة بغيرها على الظروف، دلوقتي اتجوزت وعندي بنت، وقبل ما أدخل العمليات كتبت وصيتي".

واختتمت حنان مطاوع، حديثها قائلة: "أول وصية ليا كتبتها وأنا عندي 25 سنة، وكنت موصية إن جزء من فلوسي اللي كانت كلها 1000 جنيه يروح للحاجة اللي مربياني والباقي يتقسم على صاحباتي، ماما هتتجنن من الأفكار اللي بتجيلي ولكن هي مش أفكار سوداوية، أنا مؤمنة إن في رحلة في الدنيا وفي رحلة في الآخرة".