حرصت الفنانة رشا سامي العدل ابنة الفنان الراحل سامي العدل، على إحياء ذكري وفاة والدها، من خلال حسابها الشخصي بموقع التواصل الاجتماعي الفيسبوك.

كتب رشا منشور على حسابها الشخصي بموقع الفيسبوك، تعتذر له عن عدم إدركها حجم الآلم الذي كان يعاني منه في فترة مرضه، قائلة: «فات ٩ سنين على فراقك بس السنة دي مختلفة، من أيام أنا جت لي جلطة و سبحان الله تفكيرى راح لحاجات غريبة، عرفت احساسك و قلة حيلتك و انت تعبان و بتترجاني امشيك من المستشفي علشان أسباب مش مفهومة لغيرك لما اترجيت الدكاترة بس يغطوني علشان بردانه في عز الحر و أنا مستحمية عرق و كانوا بيبصوا لي علي اني مجنونة».

تابعت: « وتفهمت ليه اني لما كنت بقول لك بلاش دلع وماينفعش نمشي و تزعق لي انك كنت متضايق زى ما اتضايقت من برود تعاملهم، عرفت وجعك وعصبيتك لما كانت بتجيلك جلطة و تتألم ،نقولك انت هاتبقي كويس و تبقي في اللحظة دي مش مصدق وتهزقنا، عملت زيك بالظبط وهزقت وزعقت في بنتي و قلت لها أنا خلاص رايحة، لما كنا في لندن، عملت عملية قلب مفتوح كنت زي البيبي خايف و مرعوب ومطيع،  كنت مستغرباك ساعتها قوي مش ده بابا، لقيت نفسي مرعوبة و خايفة بعد اللي حصل لي و بقول طيب و حاضر و ماشي و بكبر علشان مش عايزة أمر بالتجربة دي تاني».

أضافت: «السنة دي مختلفة لاني ب اعتذر لك اني ما كنتش فاهمة و لا مستوعبة اللي كنت بتمر بيه، اسفة اني كنت مش عارفة حجم الألم و الوجع و الاحساس بالضعف اللي انت كنت فيه، لو كنت اعرف ماكنتش سيبتك من حضني لحظة و كنت حاولت اعوضك كل ثانية اتكسرت فيها نفسك و انت تعبان و ضعيف،  اتمني تكون سعيد و مرتاح و نسيت كل حاجة وحشة شوفتها في حياتك و انا شكلي مش مطولة يا سمسم وهالحقك قريب انت و أحمد».

اختتمت رشا سامي العدل حديثها: «الله يرحمك و يغفر لك يا قلب قلبي يا روح روحي يا سندي و ظهرى.... انا من بعدك عدم».