أعلنت الفنانة مي عمر عن انتهاء تصوير مسلسلها «إش إش»، الذي من المقرر عرضه في موسم رمضان 2025. وكتبت مي عمر، عبر حسابها الرسمي بموقع «إنستجرام»: «الحمد لله رب العالمين فركش مسلسل إش إش، حقيقي مش قادرة أوصف إحساسي وأنا بودّع الشخصية اللي عشت معاها رحلة فيها كل حاجة من ضحك وبكاء وقلق وفرح، حبيت كل لحظة قضيتها وأنا بجسدها، وحاسة إن جزء مني هيفضل معاها دايمًا، وهيوحشني كل تفصيلة فيها بجد». وأضافت :«شكرًا من قلبي لكل حد شاركني الرحلة دي، من الممثلين اللي كانوا أحلى عيلة وأحلى صحاب. بجد، كنا عيلة واحدة، نضحك سوا، نتعب سوا، وندعم بعض طول الوقت. شكرًا لكل واحد فيكم، على كل لحظة ضحكنا فيها، وكل موقف وقفنا فيه جنب بعض. وجودكم خلّى التجربة دي ممتعة، وخلاني أحس إني فعلًا محظوظة بالشغل مع ناس زيكم. مش هنسى الذكريات الحلوة دي أبدًا، وهيوحشني كل حد فيكم». واستكملت: «محمد سامي، شكرًا ليك على صبرك وعلى نظرتك اللي كانت دايمًا بتشوف التفاصيل اللي ما حدش غيرك كان ممكن يلاحظها. شكرا إنك بتعرف ازاي تخرج مننا أفضل ما عندنا وعلى إبداعك وتوجيهك في كل مشهد. شكرًا إنك كنت قائد حقيقي لينا وخلّيت إش إش يبقى تجربة ما تتنسيش». واختتمت: «مستنية بفارغ الصبر تشوفوا إش إش وأتمنى توصل ليكم مشاعرنا بنفس القوة اللي حسيناها. شكرًا لكل واحد كان جزء من الحلم ده! وبوعد الجمهور إن شاء الله هيتفرجوا على مسلسل متعوب على كل شوط فيه، مسلسل إش إش بإذن الله هيكون مسلسل بيحترم ذوق الجمهور».