تصدرت الفنانة زينة، تريند جوجل خلال الساعات الماضية، ذلك بعد حديثها عن معاناتها فى  ولادتها التوأم فى الخارج، عن تربية أولادها بدون الأب، ذلك من خلال لقائها مع أنس بوخش.

قالت زينة: "أنا شوفت في حياتي حاجات محدش يقدر يتجاوزها.. ومحدش يقدر يعيش اللي أنا عيشته، مرحلة إني بولد في الغربة لوحدي وولادي اتولدوا تعبانين أوي وكل يوم بكتشف فيهم مرض جديد، وأنا فاكرة أنهم كتفوني عشان يغيرولي على الجرح، كنت خايفة امشي عشان ابقى قعدت معاهم أطول وقت ممكن وشوفتهم وشبعت منهم".

أضافت: "بس أن الوالدة المفروض تاكل وتستريح وأنا كنت بنسى أشرب مياه وفي المستشفى افتكروني مجنونة وواحدة مش طبيعية وماليش أهل خالص وجابولي شيخ ودكتورة نفسية والدكتورة دي كانت هندية وأنا بكلمها عربي، واتضح إني بكلمها عربي عشان مطمنة لها،جابوا لي مترجمة عشان كانوا هياخدوا عيالي لأنهم فاكرني مش طبيعية وكنت عنيفة معاهم أوي، المترجمة عرفتني وقالت لهم إني ممثلة مشهورة ودخلوا على جوجل وعرفوني".

استكملت زينة حديثها: "قالتلي اسكتي خالص واعملي اللي أقولك عليه عشان هياخدوا عيالك لأنهم أمريكان ومن حقهم، نزلت وجبلتهم هدايا وعملت حاجات تحسن صورتي، والدكتورة الكبيرة قالتلي لو كل الأمهات في البلد بتاعتك زيك دي تبقى أعظم بلد في العالم".

أما عن معاناتها في تربية أبنائها التوأم عز وزين الدين بمفردها، قالت: "اللي ماترباش على حاجة مايعرفش هو فقد أيه، ممكن اللي فقدوه مش حلو يمكن عوض ربنا أحسن ويمكن ربنا يعوضنا بالأهم والأحسن مستقبل وحياة، ولادي بقولهم كل مشاكلي وبتكلم معاهم كأنهم صحابي عمرهم 11 سنة، وأنا بحكي لهم كل حاجة وعمري ما خبيت عليهم حاجة وأنا بسمع كلامهم، أصل مين هيكون أغلى منهم مفيش حد".