«نورت منطقتك.. كلنا معاك يا ريس»، بهذه الكلمات البسيطة والمفعمة بالحب، تحدث إسلام خالد مع الرئيس عبدالفتاح السيسى خلال زيارته بصحبة الرئيس الفرنسى إيمانويل ماكرون منطقة خان الخليلى بحى الجمالية، وفى غضون دقائق قليلة تحول «إسلام» إلى «تريند» على مواقع الـ «السوشيال ميديا»، بعد تداول موقفه وترحيبه بالرئيس و«ماكرون» فى مشهد أثار إعجاب الحضور وأظهر مدى قرب القيادة السياسية بين المسؤولين والشعب المصري، ما يعكس الصورة الإيجابية لمصر كدولة آمنة ومستقرة.

إسلام خالد، 28 سنة من «الجمالية» خريج كلية الآداب قسم آثار جامعة عين شمس، تحدث مع «المصور»، وقال: «عندى محل هدايا فى الحسين بخان الخليلى، كنا شغالين عادى يومنا الطبيعى ولم نكن نتوقع أى حاجة ولا كان يخطر على بالنا أن الرئيس عبدالفتاح السيسى بنفسه هيعدى من أمام المحل».

وأضاف: «احنا كنا عارفين بس إن فى زيارة جاية، لأن احنا متعودين على الزيارات لأن ده شارع سياحى ومنطقة سياحية ولم ندرِ أن الرئيس الفرنسى بنفسه هو اللى جاى مع الرئيس عبدالفتاح السيسى، آه احنا كنا شايفين أعلام مصر و أعلام فرنسا بس قلنا مثلاً ممكن يكون وزير أو مسؤول أو أى حد من فرنسا بس لم نتوقع أن يكون الرئيس السيسى والرئيس ماكرون، عند دخول الرئيس السيسى والرئيس ماكرون، خان الخليلى هتف الجميع لهما كانت فرحة عارمة بوجودهما وأن نراهما وجها لوجه، بصراحة اللحظة دى لا أحد يقدر يوصفها لأنها كانت لحظة فرحة جميلة بأن ترى رئيس الجمهورية ومعه الرئيس الفرنسي أمام عينيك».

وأضاف «إسلام»: «عندما اقترب الرئيس عبدالفتاح السيسى من المحل قمنا بالترحيب به، فما كان منه إلا أن طالبنا بتوجيه التحية لـ «ماكرون» باعتباره الضيف «لا ترحبوا بى، رحبوا بالضيف ماكرون، فأنا فى منطقتى» فقمنا بالرد عليه يا ريس احنا عارفين إن دى منطقتك بس احنا بنحبك والله يا ريس وعايزينك أنت وبعد إذنك عايزين نتصور معاك فقال لى آه طبعا أنتم ولادى تعالوا انزلوا اتصوروا، فوقفنا طبعا خدنا الصورة الجميلة دى وكنا فرحانين جدا، وهم كانوا فرحانين برضه قوى يعنى وشوفنا فى عيون الرئيس الفرنسى ماكرون فرحة وسعادة وأنا كنت بعمل لايك فقام الرئيس الفرنسي بعمل لايك كمان فى الصورة مثلى».

وتابع: «بعد ذلك قمنا بالترحيب بالرئيس الفرنسى، وتحدثنا معه باللغة الفرنسية لأن أصغر واحد فينا فى المنطقة كلها بيعرف لغات واحنا بنعرف فرنسى وكلنا عارفين جميع اللغات بدون مترجم، المكان كان فى ناس كتير وكان فيه عرب وأجانب والرئيس بنفسه كان بيروح يسلم على أصحاب المحلات الموجودين فى المنطقة، وأكثر حاجة أعجبتنا فى الرئيس هى تواضعه واحترامه لكل الناس اللى موجودة، وكمان إن مفيش أى حد منعنا إن احنا نتصور معاه أو نوصل له، وأى شخص يقول له ياسيادة الريس أنا عايز اتصور معاك فكان فعلا بيتصور مع الرئيس ومع المسؤولين اللى كانوا موجودين كلهم».

وعن صورته التى انتشرت على الـ «سوشيال ميديا»، قال «إسلام»: «لم أكن أتوقع أن الصورة ستنتشر بالشكل ده، أنا نشرتها على صفحة موقع التواصل الاجتماعى وقمت بإرسالها إلى والدى لأننى ووالدى بنحب الرئيس السيسى جداً وهو بقى فرحان ومبسوط جدا إنى اتصورت مع الرئيس، وفى النهاية نشكر الرئيس السيسى على اختياره لهذه المنطقة لاستقبال الرئيس الفرنسى إيمانويل ماكرون».