كانت أمال فهمي صاحبة برنامج «علي الناصية» تصحب ميكروفونها وتقوم بجولة في طريق الهرم وفي الطريق قابلت النجم عماد حمدي فاستوقفته قائلة:
استاذ عماد.. علي فين؟!
رايح سوق الإنتاج إن شاء الله
النهاردة الجمعة والسوق مزحوم مش خايف من الجمهور؟
وأخاف ليه ده احنا عايشين بنفسه
كممثل .. أيهما تفضل النهاية السعيدة أم الحزينة للفيلم؟
الواقع أنني لا استطيع الانحياز إلي أيهما ولكني أحب أن تكون النهاية نتيجة منطقية لحوادث الفيلم ولكني أيضا أعرف أن الجمهور يحب الفنانين ولا يحب أن يخرج من الفيلم وهو متأثر بأن البطلة قد ماتت في آخره لأن الجمهور عادة يفضل النهاية السعيدة.
الزواج غير الموفق موجود في كل الأوساط لكنه ظاهرة واضحة بالنسبة للفنانين تقدر تعلل هذه الظاهرة؟
وسكت عماد سكتة طويلة ثم ابتسم وقال:
- قد يكون السبب هو عدم انتظام حياة الفنان وعندما كنت زوجا كنت أعود من عملي متعبا أحن إلي زوجة ترعي شئوني وتيسر راحتي فأجدها تستعد للخروج إلي عملها وكذلك كانت الحال معها بل كنت أعود من سفر فأجدها قد سافرت وهذا يلغي شروط الحياة الزوجية التي تتطلب التقارب والتفاهم بين الزوجين ثم أن هناك عاملا آخر مهما في فشل الزواج بين الفنانين «الغيرة» هو يغار عندما يري زميلا يقبل زوجته علي الشاشة أو يحتضنها لا تقولي إن ذلك تمثيل مهما كان التمثيل فنحن شرقيون يجري في عروقنا الدم الحامي.
بالمناسبة دي تحب تسمع إيه في الإذاعة؟
- أغنية جديدة الناس بيقولوا عليها حلوة وأنا لسه ماسمعتهاش أغنية عبدالحليم حافظ «بتلوموني ليه».
طيب يا أستاذ عماد راح نسمعها لك ورأت أمال أن تترك الميكروفون لعماد ليقدم البرنامج ورضخ عماد للأمر الواقع..
وكان أول من صادفه عماد بعد أن أمسك بالميكرفون رجلا يلبس الجلبات ومن فوقه المعطف من أنصار الطربوش ويبدو أنه كان يعرفه إذ بادره قائلاً:
صباح الخير يا عم محمد
- صباح الخير يا أستاذ عماد
تحب تتكلم في برنامج علي الناصية؟
- بكل سرور أمال الست آمال فين؟
موجودة بس أنا النهاردة بأقدم البرنامج قوللي إنت رايح علي فين كده؟
رايح أصلي الجمعة - وبعدين راجع الاستديو تاني؟
الله دانا نسيت أقدمك للمستمعين أنت بتشتغل إيه بالضبط؟
- فراش في استديو مصر
كام سنة لك في الاستديو؟
بقالي «فراش» أكثر من 30 سنة في الاستديو
علي كده تعرف ممثلين كتير؟
- كلهم تقريبا يا أستاذ وكلهم ناس طيبين الله يرحم اللى راح منهم ويخلي الموجودين
قولي ياعم محمد إنت متجوز؟
وعندي ثلاثة أولاد
ومبسوط في عملك ده؟
الحمد الله مستورة وماشية
إنت بتسمع راديو ياعم محمد؟
أنا شخصيا أحب الإذاعة قوي إنما اللي بيضايق الواحد إن فيه برامج حلوة جدا تذاع متأخرة أوي زي برنامج مع مؤلفي الأغاني أو نجوم الغناء وفيه كمان أغاني حلوة قوي ما بتذيعوهاش إلا في نص الليل.
طيب تحب تسمع إيه ياعم محمد؟
أحب اسمع صباح الخير للست أم كلثوم
واستوقف عماد صبية صغيرة وسألها:
تسمحي يا آنسة؟!
استاذ عماد أهلا وسهلا دانت شكلك حلوي قوي
متشكر تقدري والله؟
الأول قوللي يا أستاذ عماد بيقولوا إنك هترجع لشادية خصوصا بعد ما مثلت معاها تاني صحيح؟!
اسمحي لي أسأل أنا أنا اللي بأقدم البرنامج ؟ اسمك إيه؟
أمال عبدالحميد
بتحبي التمثيل يا آمال؟
موت يا أستاذ عماد كل روحي في التمثيل
طيب تفضلي تتجوزي والا تشتغلي في السينما؟
إنت عاوز الجد إن كان حبيبي هو الزوج المنتظر يبقي أحسن لأن السينما مش مضمونة قوي
بتسمعي الراديو يا تري؟!
طول النهار هوه أنا ورايا حاجة غيره كل الأغاني بتفكرني باللي بحبه؟
طيب يا ستي تحبي تسمعي إيه؟
أي أغنية حزينة أنا قلبي مجروح عاوزه أسمع «أهواك» لعبدالحليم حافظ وإلا «بحب من غير أمل» لفريد الأطرش
طيب يا ستي إحنا متشكرين وخدي بالك من نفسك
وعلي ناصية أخري شاهد عماد فتاة ترتدي السواد فاقترب منها وقال في خجل واضح وهو ينظر تجاه آمال:
صباح الخير يافندم؟
أهلا وسهلا استاذ عماد إزيك ياست آمال؟
تسمحي تقدمي نفسك للمستمعين؟
اسمي كاميليا عباس
إنت بتروحي سينما يا آنسة كاميليا؟
طبعا كل الأفلام عربي وأفرنجي
ما جربتيش تشتغلي في السينما؟
لا ماجربتش لأني مش قد السينما لا موهبة ولا هواية
متجوزة؟
علي وش جواز مستنية المحطة اللي أحب واتجوز فيها؟
لازم الحب يعني عشان تتجوزي لو جاء الحب بعد الزواج مش يبقي أحسن؟
لازم يكون فيه ولو بشاير حب علشان يبقي جواز معقول مستقر
طيب تحبي اسمعك إيه في الإذاعة؟
فيه أغاني كثيرة حلوة أحب اسمع «خي» لمحمد عبدالوهاب
طيب يا ستي إحنا متشكرين قوي وربنا يوفقك
العفو بس قبل ما تمشي أحب أسألك سؤال واحد ما فيش غيره.
تحت أمرك
حقيقي إنت هترجع لشادية؟
وابتسم عماد وهرب بالميكرفون من أمامها واكتفي بهذا القدر وأعاد الميكرفون لآمال وقال :
إن شاء الله أكون نجحت؟
ده إنت عال قوي وأنا متشكرة قوي يا أستاذ عماد.
الكواكب عدد 388 - 6 يناير 1959