شنّت الفنانة سارة نخلة، هجومًا شرسًا على مذيعات برنامج "نفسنة"؛ لعدم إذاعة حلقتها.
وقالت عبر صفحتها على "فيسبوك": "من شهرين تقريبا استضافونى فى برنامج نفسنة.. وصلت الاستديو وبعد انتظار أكثر من 5 ساعات، وعايزة امشى بس عشان زميلتى العزيزة هيدى كرم، هى الّى اقترحت استضافتى بعد لقائنا فى تصوير مسلسل هبة رجل الغراب".
وأضاف: "أنا كنت متحمسة للحلقة عشان فاكراها حلقة ضحك وهزار وفرفشة، المهم بقا بعد كل الانتظار دا، بسمع صوت ردح وزعيق وصريخ وكلام فظيع، المهم الأستاذة بدرية والأستاذة انتصار مع كل احترامى ليهم طبعا، بيتخانقوا مع حبيبة، واللى فهمته أن حبيبة سابت البرنامج ومشيت، فبالتالى أتاخرو عشان يفهموا هيعملو إيه".
وتابعت: "طلعت صورت وكانوا لطاف جدا انتصار وبدرية وهيدى حقيقى كانت حلقة لطيفة جدا.. عدى شهرين وأنا بسال إمتى حلقتى هتطلع، والإنتاج يقولى كمان شوية، وكمان شوية، وكمان شويتين".
وواصلت: "من خمس أيام عرفت من الإنتاج أن الحلقة مش هتتعرض،  بحجة المذيعات طالعين مش حلوين، نعم يا فندم هو مفيش مونيتور، هو مفيش مخرج كان قاعد بيشوف هو مفيش ناس متابعه هو مفيش مكياج هو ايه بالظبط.. قالك ولله المذيعات كانوا متوترات بسبب اللى حصل قبل الحلقة.. ومعليش يا استاذة احنا هنعيد الحلقة.. نعم.. يعنى مطلوب منى ارجع أمثل وأعيد اللى عملته عشان المذيعات كانوا متوترات".
واستكملت هجومها: "هو المخرج دا بيكون موجود فى الحلقات كلها وبيشوف النفسنة والردح والكلام الغريب، وما شافش أن المذيعات كانوا متوترات بصراحة شابو على برنامج التمثيل النفسناوى البحت... السؤال هنا هل سبب عدم العرض هو أنى قولت فى الحلقة انى بحب حبيبة الكيوت اللذيذة المحترمة، أو لأنى كنت عفوية وطبيعية جدا وهم متعودين على التمثيل"، متابعة: "معلومة لا تعرفوها.. بيعرضو اللى هم عايزينو والباقى بيروح بالمونتاج".