نعت الفنانة ريهام عبد الغفور مدير التصوير الراحل تيمور تيمور، الذي توفي مساء السبت غرقًا أثناء محاولته إنقاذ نجله في رأس الحكمة.

وكتبت ريهام عبد الغفور منشور على حسابها الشخصي بموقع التواصل الاجتماعى الفيسبوك:"يا حبيب قلبي يا تيمور، ياللي أهل بيتك بيقولوا عليك كنت حنين وفرقوش وطيب وبتحب أوي جبر الخواطر،ياللي أهل مراتك بيقولوا عليك لما دخلت حياتهم جبتلهم الأمان والسلام، ياللي أمك بتقول عليك كنت بني آدم حنين وكويس أوي وابن بار، ياللي زمايلك وأصحابك بيقولوا عليك كنت مسهل عليهم حياتهم.

وتابعت:"ياللي العمال كانت بتفطر معاك في طبق واحد في اللوكيشن، ياللي مخلص لشغلك، ياللي ضحيت بحياتك عشان تنقذ ابنك، ياللي قعدت تسمعني وأنا بقولك إن قلبي انكسر على أبويا وتطبطب عليا، وكنت فاكرة إن عمري ما هتوجع تاني بس فراقك ،وجعني أوي أوي أوي ووجع كل حد عرفك، كل الناس بتحبك وبتدعيلك وعمرها ما هتنساك، عشان أنت سبت أثر وحكاية حلوة عند أي حد عرفك".

واختتمت ريهام عبد الغفور حديثها:"ربنا يسعدك في الجنة ويجعلك في أعلى درجاتها، ويجمعنا بيك وبالغاليين في الجنة يارب.. أسألكم الفاتحة والدعاء".