أكدت المطربة شاهيناز أن فترة ابتعادها عن الساحة الفنية لم تكن خسارة كما قد يظن البعض، بل كانت بمثابة «هدنة إلهية» أعادت ترتيب أولوياتها ومنحتها نظرة مختلفة للحياة والفن.

وقالت شاهيناز خلال لقائها في برنامج "اسمعني شكرا": «الفترة اللي بعدت فيها دي ظاهر الأمور ممكن تكون تعطيل أو وقت ضاع، لكن من ثقتي في ربنا بشوف إن أفضل سيناريو مكتوب في حياتك هو اللي ربنا كاتبه، حتى لو كان عكس إرادتك».

وأوضحت أنها كانت على يقين أن الغياب لم يكن إلا لحكمة، مضيفة: «قلت لنفسي يمكن لو كنت كملت في الوقت ده كانت حصلت مشكلة كبيرة في حياتي، أو حاجة في شغلي كانت ممكن تقلل من محبة الناس ليا، لكن الحمد لله أنا بشوفها فترة راحة واستعادة طاقة».

وأضافت: «كل مرة بكون فيها في حفلة أو فرح بحس إن الناس مش حاسة بفترة غيابي، وده بيديني طاقة إيجابية كبيرة. الحمد لله قدرت أعمل بصمة، واللي بيحبني فعلاً لسه موجود، وده واضح من تفاعل الناس مع الأغاني الجديدة اللي قدمتها لما رجعت».

تجربة شاهيناز مع محمد رمضان.. ديو استثنائي ونقطة قوة فنية

وتطرقت شاهيناز للحديث عن تجربتها الفنية مع النجم محمد رمضان، ووصفتها بأنها تجربة مميزة وتعتز بها كثيرًا، قائلة: «تجربتي مع محمد رمضان بعتز بيها جدًا، لأني من فانزه، وهو فنان جميل ومجتهد».

وكشفت عن بداية فكرة التعاون بينهما، قائلة: «اتقابلنا من كام سنة في مناسبة تخص أحد الأصدقاء، وبدأنا نتكلم، وكنت أنا اللي اقترحت عليه فكرة الديو. كان لسه بادئ يغني، فقلت له تعال نعمل أغنية سوا، وفعلاً اتحمس وقال: فكرة حلوة».

وتابعت: «مرت سنة أو اتنين، وفضل بينا تواصل كزملاء، لكني محبتش أكرر الطلب عشان مبقاش زنانه، وده يمكن كان غلط مني لأن في مجالنا لازم نتابع. بعد فترة لقيته هو اللي بيكلمني، وفرحت جدًا، لدرجة إني قلت له “ده التليفون نور”».

وأكملت شاهيناز: «قالي عندي أغنية هبعتها لك، قلت له من غير ما أسمعها أنا موافقة. سجلناها فعلًا، وكان المفروض نصورها بس هو انشغل بتصوير جعفر العمدة، ومع ذلك احتمال كبير يكون في عمل تاني يجمعنا قريب، وساعتها هيتصور إن شاء الله».