أبدى المطرب عمر كمال استياءه من الانتقادات التي طالته بعد الإعلان عن فريق عمل ألبومه الجديد، مؤكدًا أنه تعرض لهجوم غير مبرر رغم تعاوناته مع مجموعة من أهم صناع الموسيقى في مصر.

ورفض كمال وصف البعض للتعاون مع الفنانين المعروفين مثل رامي جمال، تامر حسين، عزيز الشافعي، ومدين بالسقطة، معتبرًا أن هذه النجاحات كانت نتيجة جهد مشترك واستحقاق.

وقال عمر كمال في تصريحات تليفزيونية: "كنت محظوظ أني تعاونت مع ناس لها اسمها ونجاحها الكبير، زي تامر حسين وعزيز الشافعي ومدين ومصطفى العسال وتوما ورامي جمال… ناس كتير جدًا، الحمد لله ربنا كرمني وحققت حلمي أني اشتغلت معاهم".

وأضاف: "لما نزلت صوري مع صناع ألبومي الجديد زي رامي جمال وعزيز الشافعي ونادر حمدي، الناس قالت سقطة في تاريخهم، ليه مش أنا بني آدم ومن حقي أجرب؟ دي ناس سوية وشبعانة شهرة ونجاح وفلوس، مفيش أي حاجة تجبرهم يشتغلوا معايا إلا لو شايفين فيا حاجة كويسة. وفي نجوم كنت بطمح أني أعمل معاهم دويتوهات وشبه الاتفاق حصل وبعد كده رفضوا، أنا مبسوط وده إداني تحدي أكبر وهثبت لهم أنهم على غلط وأني استحق، أنا لازم أجرب، اللي مالوش قلب مالوش رزق".

وتابع : "ألبومي اسمه عمر كمال الرهان كسبان، وإن شاء الله يبقى رزقه من اسمه. وده كان لوني الأساسي من البداية. زمان كنت بغني للغربة وبغني لأبويا، وكان عندي تجارب كتير في الأول ولكن لم تحقق النجاح اللي كنت منتظره، وأنا كل 5 سنين في حياتي لازم أسأل نفسي وصلت لإيه وهعمل إيه".

واختتم عمر كمال: "وحصلت الصدفة والخير من ربنا أن دي كانت السنة الخامسة ليا في الشعبي، وعايز أجدد لوني الموسيقي. ربنا كرمني بفرصة كويسة أني أدخل من الباب الكبير لعالم البوب، وده هيتنفذ بشكل رائع فانتهزت الفرصة وأخدتها".