نعى الفنان حسن الرداد، في منشور مؤثر عبر حسابه على موقع التواصل الاجتماعي الفيسبوك، وفاة مراسي التي كانت تعمل ضمن فريقه، حيث أعرب عن حزنه الشديد لرحيلها المفاجئ، مؤكدًا تقديره الكبير لها ولأخلاقها الرفيعة.

كتب الرداد عبر حسابه الرسمي على موقع التواصل الاجتماعي الفيسبوك: مراسي مراسي مع كل الألم والأسف والحزن من كل قلبي بنعي بنت اسمها #مراسي، مراسي دي بنت جميلة جداً جداً جداً لسه في مقتبل العمر عندها 21 سنة كانت بتشتغل معانا، لسه متوفية دلوقتي.

وأوضح: أنا بصراحة مش قاد أصدق إني بكتب لها رثاء وفاة، لكن بكتب علشان أعبر عن امتناني وحبى و تقديرى لها و أد إيه كانت إنسانة جميلة، مؤدبة، محترمة، أمينه و عينيها مليانة.

وتابع: رغم أنها بتشتغل معانا من سنتين بس، لكن تعتبر فترة كبيرة بالعشرة الموجودة، أنا حزين عليها زي ما تكون واحدة من عائلتي بالظبط واكتشفت إن ساعه الفراق بتحس إن فى ناس مهمين فى حياتك جدا و ممكن يكونوا مش قريبك وما بيتكلمش نفس لغتك، مش من نفس بلدك، مش من نفس ديانتك، ولا من نفس المستوى الاجتماعى بتاعك، بس بتشتركوا إن إنتوا الاثنين بنى آدمين.

وأشار: أنا حبيت اكتب لها بوست (رغم انه حاجة بسيطة) تقديرا لها و لمكانتها، مش لازم تبقى من عيلتى أو شخصية عامة عشان اكتب لها بوست رثاء، هى كانت شخصية بسيطة لكن إنسانة كبيرة و غالية عندنا جدا.

وأكد: قيمة الإنسان من إنسانيته و تأثيره فى الآخرين بأفعاله و مواقفه و أخلاقه العالية.

واختتم: الله يرحمها و يصبر أهلها و يصبّرنا، أرجو الدعاء لها بالرحمة والمغفرة.