احتفلت الإعلامية أسما شريف منير بعيد ميلاد ابنتها لارا الثالث عشر، وشاركت جمهورها صورة تجمعهما بطليقها ووالد ابنتها، عبر حسابها الرسمي على موقع الانستجرام.

وحرصت أسما شريف منير، بالتزامن مع احتفالها بعيد ميلاد ابنتها، على توجيه رسالة إلى كل أب وأم يمران بتجربة الانفصال أو الطلاق، مؤكدة أن انتهاء العلاقة بين الطرفين لا يعني بالضرورة تحولها إلى خلاف أو صراع، خاصة عندما يكون هناك أبناء بينهما.

وقالت أسما شريف منير: «السنة الـ13 للصورة اللي بقت من أحلى عاداتنا، صورة واحدة كل سنة، بس عمرها ما بتبقى نفس الصورة، إحنا بنتغير، ولارا بتكبر قدام عينينا، وكل سنة بنكتشف فيها نسخة جديدة منها، اهتمامات جديدة، شخصية بتتكون، وتفاصيل بنحب نشوفها وهي بتتغير سنة ورا سنة».

وأضافت: «ربنا يحفظك ويبارك لنا فيها وفي عمرها، ونفضل ناخد الصورة دي لحد الجامعة كمان يا رب».

وتابعت أسما رسالتها قائلة: «أحب أفكر أي حد بيعدي بانفصال أو طلاق إن الانفصال أو الطلاق مش لازم يتحول لمعركة، ومش لازم ولادنا يدفعوا تمن إن علاقة بين اتنين كبار ما كملتش، ممكن العلاقة تنتهي، لكن الاحترام ما ينتهيش».

وأوضحت أن لكل طرف الحق في استكمال حياته دون التأثير سلبًا على الأبناء، قائلة: «ممكن كل واحد يكمل حياته، يحب ويتجوز ويبدأ من جديد، من غير ما الطفل يحس إنه لازم يختار طرف، أو يحس بالذنب عشان بيحب كل الناس اللي في حياته».

وأكدت أسما شريف منير امتنانها لوجود أشخاص يحبون ابنتها ويحرصون على مصلحتها، مضيفة: «أنا الحمد لله ممتنة جدًا إن لارا حواليها ناس بيحبوها بجد».

أسما شريف منير: الأهم أن تكبر ابنتي محاطة بالحب

واستكملت أسما حديثها عن علاقتها بطليقها وحرصهما على مصلحة ابنتهما، قائلة: «أبوها عايز يشوفها مرتاحة وناجحة وسعيدة، وأحمد بيحبها بجد وعايز يشوفها مرتاحة وناجحة وسعيدة».

وأضافت: «كل اللي يهمني إن بنتي تكبر وهي عارفة إن حب الناس ليها مش منافسة، وإن مفيش حد محتاج ياخد مكان حد، كل واحد له مكانه، وكل واحد له دوره، والأهم إن هي تبقى في النص محاطة بالحب، مش محطوطة في النص بين خلافات الكبار».

ووجهت رسالة أخيرة إلى الآباء والأمهات الذين مروا بالانفصال، قائلة: «يمكن دي أهم حاجة أحب أفكر بيها أي أب وأم انفصلوا: حطوا ولادكم قبلكم، احترموا بعض عشانهم، وسيبوهم يحبوا كل الأطراف من غير خوف ولا إحساس بالذنب».

واختتمت أسما شريف منير رسالتها بالتأكيد على أهمية الحفاظ على شعور الأبناء بالأمان، قائلة: «يمكن أنجح حاجة ممكن نعملها بعد ما علاقة تنتهي، إننا منخليش معاها إحساس الأمان عند ولادنا ينتهي، الحمد لله على لارا، وعلى كل سنة جديدة بناخد فيها الصورة دي، وعلى إننا لسه بنشوفها بتكبر قدام عينينا وإحنا كلنا بنحبها».