كشفت الفنانة يسرا عن جوانب من شخصيتها وطريقة تعاملها مع الحياة والعمل، مؤكدة أنها شخصية طبيعية وواضحة، تظهر عليها مشاعر الفرح والحزن والحب، وترى أن صراحتها ووضوحها هما سرها الحقيقي.

وقالت يسرا، خلال لقائها مع الإعلامية لميس الحديدي في برنامج «الصورة»، المذاع على شاشة «النهار»: «أنا ست طبيعية، بيظهر عليا المشاعر، سواء فرح أو حزن أو حب، وأنا واضحة، وده سري الحقيقي».

وأضافت: «الحكاية إني ست واضحة لحد كبير، معنديش الرتوش اللي بتتعمل مع أي نجم، ومرات مش بعرف أعملها».

يسرا: أنا دبلوماسية لكن واضحة وصريحة

وأوضحت يسرا أنها تجمع بين الدبلوماسية والصراحة في تعاملاتها مع الآخرين، قائلة: «أنا ست دبلوماسية، ده حقيقي، مش بزعل حد، بس في نفس الوقت أكون واضحة معاه».

وتابعت: «لما أقول مش عاوزة أعمل ده، أبين السبب وأقوله، لازم أكون صريحة وأشرح للي قدامي أسباب قراري في أي شيء».

يسرا: جيلنا صنع تاريخه قبل زمن زيف السوشيال ميديا

وتحدثت يسرا عن طريقة تقييم الفنان لنجاحه، مشيرة إلى أن السوشيال ميديا أصبحت مؤخرًا عاملًا مؤثرًا في تحديد شهرة البعض، قائلة: «ده كله مؤخرًا لما بقى فيه سوشيال ميديا، لكن إحنا جيل صنعنا تاريخنا قبل السوشيال ميديا».

وأضافت: «مكنش فيه حد ندفع له فلوس عشان يكتب عني هايلة، واللي يشتمني أدفع له فلوس. كل هذه الظواهر حديثة الفترة الأخيرة، وده أوحش شيء، إننا نمسك سلاح زي السوشيال ميديا ونستخدمه».

وتابعت: «الناس مش فاهمة، هما عاوزين تريند وخلاص، ما يعرفوش إن ده سلاح ممكن يؤذي أي حد، وممكن يرفعه أو يوقعه على حبل رقبته».

يسرا: مش عاوزة أشتري تريند.. ده مش نجاح

وأعربت يسرا عن فخرها بأنها بنت تاريخها الفني قبل انتشار ظاهرة شراء الترندات والمتابعين، قائلة: «أنا مش عاوزة أشتري تريند، هذا ليس نجاحًا، بل زيف».

وأضافت: «اللي بيشتري تريندات ومتابعين بيبقى عارف إنه مزيف وعاوز كده، لأن الدنيا دلوقتي ماشية كده، أيا كان فنان أو فنانة، وده مش صح، مش حقيقي».

واستطردت: «زي ما أروح أشتري جائزة، أبص لنفسي إزاي في المراية وأشوف نفسي إزاي؟ فين المنطق؟».

يسرا: حاربت بذراعي وشفت النجاح والفشل

وأكدت يسرا أنها خاضت مشوارها الفني بنفسها، وشهدت خلاله مراحل مختلفة بين النجاح والفشل والصعوبات، قائلة: «أنا في تاريخي حاربت بذراعي، وشفت كل حاجة، النجاح والفشل وكل المراحل».

وردًا على سؤال لميس الحديدي حول ما إذا كانت ترى أن خسائرها في الحياة أكبر من نجاحاتها أم العكس، قالت يسرا: «فخورة وراضية أوي».

وأضافت: «غير عاش وعمل وسوى مش موجود. إني أبقى في مكانة كبيرة مدى حياتك من يوم البداية، ده رضا كبير».

واختتمت حديثها مؤكدة رضاها عن كل ما مرت به في مسيرتها، قائلة: «لازم أكون راضية بكل الحروب، وبكل الثمن، وبكل الكلام اللي اتقال عليا، وبكل الشائعات اللي شفتها كل خمس دقايق، وأفضل في المكانة دي، لازم أكون راضية».