انتقد المطرب سمسم شهاب حالة الأغنية الشعبية خلال الفترة الحالية، معتبرًا أن ما وصلت إليه بعض أشكال الفن الشعبي يمثل، من وجهة نظره، اضمحلالًا للهوية الشعبية وتراجعًا في مستوى المحتوى المقدم للجمهور.

 وقال سمسم شهاب، خلال مقطع فيديو نشره عبر حسابه الرسمي على موقع التواصل الاجتماعي «فيسبوك»: «إحنا محتاجين الضبط، كفاية أوي الدور اللي بيقوم بيه مطربين المهرجانات، مبوظين ودان الناس وسلوك الشباب وطريقة اللبس وكل حاجة».

 وأضاف: «أنا اتكلمت في الموضوع ده وبنادي فيه من 2010، وقلت إن ده اضمحلال الأغنية الشعبية وهدم الهوية في الأغنية الشعبية. الجيل بتاعنا كنا بنعمل أغاني بتتكلم عن الرزق والأخ والأم والمستوى الاجتماعي، وكنا بناقش قضايا، لكن الناس دي بتقدم إيه للناس؟ شيء صعب أوي».

 وتابع منتقدًا حالة التناقض التي يراها في ردود فعل الجمهور: «كل ما بقعد مع أي حد بلقاه ناقم على الوضع، طيب مين اللي راضي بيه؟ هل في شيزوفرينيا عند الناس؟».

 وتطرق سمسم شهاب إلى الانتقادات التي توجه إليه بشأن ابتعاده عن الأضواء وعدم تقديم أعمال تحقق أرقامًا ضخمة من المشاهدات، قائلًا: «في ناس قالتلي إني مقصر في حق جمهوري ونفسي، أنا بقدم شغلي وبعمل اللي عليا، ومش ذنبي إن الناس ما بتعملش سيرش».

 وأوضح: «اللي بيحب شخص بيدعمه وبيدور عليه، بس الناس بتستسهل، وبيقولوا إنهم عندهم ملايين المشاهدات. لكن المحترمين في الشعب المصري، وما أكثرهم، ما بيسمعوش النوعية دي».

 وانتقد شهاب بعض الكلمات والمضامين التي تتضمنها بعض الأغاني الشعبية والمهرجانات، معتبرًا أنها تسهم في نشر مشاعر سلبية بين الناس، قائلًا: «دي أغاني معايرات وسببت بين الناس حالة من الغل، بدل ما نصنع بين الناس الحب والاحترام».

 وأكد أن الفنان يجب أن يكون له دور إيجابي في المجتمع، مضيفًا: «المفروض نكمل مسيرة المُدرس، ودورنا إننا نصدر صورة مجتمع كويسة».

 وأكد سمسم شهاب أنه يستطيع تقديم نوعية مختلفة من الأغاني التي تحقق انتشارًا سريعًا، لكنه يرفض ذلك إذا كان على حساب قناعاته واحترام جمهوره له.

 وقال: «أنا بإيدي أعمل النوعية دي وفي ثانية هبقى في حتة تالتة، ولكن مش هبقى راضي عن نفسي وهفقد احترام الناس اللي بتحبني».

 وأشار إلى أنه ابتعد عن المشهد الفني، بحسب قوله، منذ منتصف عام 2016، موضحًا: «أنا يعتبر تم استبعادي عمدًا من نص 2016، يعني من 10 سنين كاملين، ورغم ذلك لو بعد 100 سنة الواحد هيفضل سيرته كويسة».

 وتابع: «أنا عايز حد يقولي لو قدمت إسفاف أو قلت كلمة وحشة لحد. الفنان والرياضي لا يُقاس بعمره ولا بعدد مشاهدين، الفنان يقاس بما يحترمه ويقدمه للناس».

 واستطرد: «أنت ممكن يشاهدك ملايين من البشر، ولا نوعيتهم إيه؟ وثقافتهم إيه؟ وممكن يشاهدك عشرات الآلاف ولكن محترمين».

 وانتقد سمسم شهاب ما وصفه بانتشار بعض الأغاني التي تحمل مضامين غير لائقة في المناسبات والأماكن العامة، قائلًا: «الزملاء الفنانين اللي معايا في نفس التصنيف، كلهم إلا من رحم ربي، واحد أو نص واحد ما زال محتفظ، ولكن الباقي راحوا، ولما تيجي تتكلم يقولك ده اللي ماشي».

 وأضاف: «يا جماعة إحنا بقينا نسمع في الشارع حاجات صعبة أوي، لما تقعد في فرح وتلاقي أغنية إباحية شغالة، ده ينفع؟».

 واختتم حديثه بالرد على من ينتقدون موقفه، قائلًا: «لما نيجي نتكلم يطلع حد يقولك هو أنت بتبيع سبح؟ مقولتش إني ببيع سبح، ولكن على الأقل ما بمنعش اللي بيبيع سبح يبيع، على الأقل ما بقدمش ليك شيء غير محترم. عايز تنتقدني انتقد، بس بأدب».