أ ش أ
أهدى قطاع الإعلام والعلاقات بوزارة الداخلية، اليوم الثلاثاء، الأم المصرية قصيدة شعرية بمناسبة الاحتفال بعيد الأم الموافق 21 مارس من كل عام.
وفيما يلى نص القصيدة:
جانى تانى وجابلى وردة
كان فاكرنى هاخدها وأرضى
قاللى جايلك من هناك
أحكى عن كل اللى فات
قال يا أمى
أوعى يوم تفتكرى إنى
راح أسيبك
مين حبيبك
لو ماضحى عشان عيونك
لو ما كان بالروح يصونك
لجل ترضى يكون حبيبك
الحكاية ...
الوطن نادى يا أمى
كنت أسيبه؟..
لو يضيع الحق منُّه.. مين يجيبه
غير ولاده..
صدقينى..
إن حضن الأرض لما
بين إيديه ياخد شهيد
راح يلاقى نفس حضنك
إنتى أمى
والبلاد الغالية أمى
أوعى مرّة ف يوم تخافي
حضن أرض بلادى برضة
حضن دافى
حضن دافي.
كما أهدى القطاع أمهات الشهداء الأبرار قصيدة شعرية، بمناسبة الاحتفال بعيد الأم أيضاً وفيما يلى نصها:
يا أمّى ليه يوم تحزنى
والجنة لسه في انتظار متزينة
اللى على ايديه النهار جه أرضنا
يا أم الشهيد
إبنك بطل.. بالتضحية
و لولاه ما كانت أغنية
للانتصار
الجنة لسة فى انتظار
طلع النهار
كان البطل إبنك هناك
سابق بروحه خطوته
أفديك بروحى يا وطن
أفديك ومن دمّى التمن
الجنة لسة فى انتظار متزينة
يا أمى
قولى للى جايلك من صحابى
واللى جايلك من زمايلى
إنى أجمل حاجه إنتى
يا مصر
روحى فيكى فين ما كنتى
إنتى جنة أرض ربى
يا أمى أوعى تحزنى
الشهادة هى جنة للشهيد
يوم شهادتى يبقى عيد
إسألينى راح تلاقى قلبى من جوة سعيد
يبقى ليه ى أمى حزنك
جنة فاتحة حضنها من بعد حضنك
يا أمى أوعى تحزنى
يا أمى أوعى تحزنى.