يا أبو الشبابيك متكسرين
وباين عليك الكرم يابا
بيبانك دايمًا مفتوحين
مرة كنت مسافر
واستنيتك ما جيت
ومرة كنت مسافر
وركبت من باب
ومن بابك التاني اترميت
آه يا قطر المطحونين
لما بنكون ع المحطة
بنبقى حبايب نحكي ونتساير
ونفضل ندخن ف كومة سجاير
ولما تهل بطلتك ننسي الحكاوي
وكأننا متخاصمين
آه يا قطر الغلابة
يا أبو الشبابيك متكسرين
بتاخدنا حبايب
ولا نرجعوش
بتتغير جواك الوشوش
بتاخدنا مسافرين
وعارفين
إن إحنا مش راجعين
مرة تولع وتحرقنا
ومرة توجعنا
ومرة نندهلك ما تسمعنا
واللي رميني عليك
إن تذكرتك من أم 20
يا قطر الغلابة
يا أبو الشبابيك متكسرين
صوتك مع صوت بياعينك
يجيبوا أجدع نوع صداع
ما أعرفش من فين جيبينك
كل شئ فيك يتباع
وفين وفين علي ما توصل باب الحديد
ساعتها أقول إني اتولدت من جديد
يا قطر الغلابة
يا أبو الشبابيك متكسرين