بقلم – سليمان عبدالعظيم
على هذه الصفحة «سبع» فقرات .. لا رابط بينها سوى إطار هذه المساحة .. الفقرات متصلة بواقع نعيشه .. ليست «طق حنك» .. بل آراء حقيقية تخرج من العقل إلى سن القلم لتكتب فى النهاية عنوان هذه الصفحة.
ما تخافش
يا كابتن حسام حاجة من اتنين.. إما أنت عايز حسام غالى أو مش عايزه.. إما عايز عماد متعب أو مش عايزه!.. متعب لما بينزل الكام دقيقة إما بيجيب جون أو المدافع المنافس يمسكه ويسيب غيره من الأهلى يجيب جون!.. الغالى حسام الكابيتينو الكل بيحترمه وبيحبوه.. شخصية قائدة فى الملعب وبره الملعب.. أى نعم سنه كبر.. أى نعم «متعب كل المدافعين» سنه كبر.. لكن يا كابتن حسام «الدهن فى العتاقى».. خد قرارك عاوزهم ولا مش عايزهم!.. خايف تكون خايف يا كابتن حسام من ردة فعل الجماهير الحمراء.. طبعًا أكيد بتعمل حسابهم.. يا أبو الكباتن كل الأهلى من أول محمود طاهر إلى مجلس الإدارة ها يكونوا معاك.. ما تخافش.. بيعملوا ألف حساب لزعلك.. بدليل أنهم وافقوا على زيادة مرتبك الشهرى بـ ١٥٠ ألف جنيه ودلوقتى بتاخد ٤٠٠ ألف.. حلال عليك يا كابتن.. بس عاوز أقولك لسه «بدرى» على غالى ومتعب.. خليك فاكر!
نحاكمه!
كل شوية يطلع واحد على الشاشة يقول ليه البلد مش عايزة تستفيد من خبرات وكفاءة يوسف بطرس غالى واتصالاته العميقة بالبنك الدولى؟.. كل شوية تطلع مذيعة من إياهم تندب وتولول على أيام أحسن وزير مالية شافته مصر فى الـ ١٠٠ سنة اللى فاتوا!.. أنا بقى عايز الدكتور العبقرى يرجع على أول طيارة مش عشان يمسك وزارة زى ما الناس البعدا دول عايزين.. لا.. عايزه يرجع عشان يتحاكم على جريمته ببناء قصر على محمية طبيعية هى بحيرة قارون فى الفيوم!.. تصوروا الوزير الأسبق فرد عضلاته واستغل نفوذه القوى أيام مبارك سنة ١٩٩٩ وبنى قصره على ٤٠٠٠ متر باسم زوجته اللبنانية ميشيل خليل صايغ!.. وساعده طبعًا الكبير قوى وقتها الدكتور يوسف والى.. الفيللا المخالفة على مسافة ٧٠ مترا من المحمية، بينما القانون بيقول المسافة لا تقل عن ٢٠٠ متر.. إحنا عاوزينه نحاكمه.. مش لحاجة تانية!.
ست الستات
الله عليك يا ست نادية.. طول عمرنا بنشوفك من المستشفى دى للمستشفى دى زيارات لزملائك الفنانين المرضى.. نادية لطفى ست بميت راجل.. بتقف جنب زملائها.. كتير قوى راحت دقت مكتب وزير الصحة عشان قرار علاج لفنان على نفقة الدولة.. تجيب قرار علاج.. تزور مريض.. تجامل زميلة.. هى كده الست نادية.. آخر حاجة عرفتها أنها رأسها وألف سيف مش عايزة الدولة تتكفل بدفع نفقات علاجها فى مستشفى القوات المسلحة بالمعادى.. بتقول قرار العلاج على نفقة الدولة فيه ناس أحق منى به.. الله على الكلام وحلاوته.. الله عليكى يا ست نادية.. درس كبير ياريت فنانين وفنانات كبار قوى يعملوا زى ما بتعملى يا فنانة يا كبيرة.. دعواتى لك بالسلامة يا ست الكل!.
شغال
فرنسا منحت إبراهيم محلب وسام الاستحقاق الوطنى الفرنسى.. قلتها لابن خالتى أحمد فتحى أجس النبض.. قال: والله يا سولم محلب يستاهل راجل شغال وبيحب الشغل.. طلع من رئاسة الحكومة اختاره الرئيس السيسى بعدها بكام يوم مساعدا لرئيس الجمهورية للمشروعات القومية والاستراتيجية.. لست وحدى الذى فرح كثيرون.. فرحوا بهذا التكريم على أعلى مستوى.. الوسام الرفيع منحه الرئيس الفرنسى فرانسوا أولاند للمهندس محلب للدور العظيم الذى قام به لمصلحة البلدين عندما كان رئيسا للوزراء.. وزياراته المتعددة فى دول الشرق الأوسط وفرنسا وأمريكا..
الوسام عندما يأتى من الخارج له طعم آخر.. من كل قلبى أقول مبروك يا باشمهندس إبراهيم محلب.
إوعى..!
سايق عليك النبى يا سيادة وزير الرياضة اوعى تتدخل فى الأزمة اللى بين اتحاد الجبلاية ورئيس نادى الزمالك!.. اوعى تتدخل لأن التدخلات الحكومية ممنوعة فى كل الاتحادات الرياضية الدولية.. سيب المهندس هانى أبو ريدة يرد.. سيبه يقول لا نخشى الصوت العالى.. سيبه يقول اللوائح هى الحاكمة.. سيبه يقول ما بنخافش من الملاسنة.. ومن ناحية ثانية سيب سيادة المستشار مرتضى منصور يقول كل اللى هو عاوزه!.. سيبه يشتم ويسب ويلعن فى الجبلاية.. سيبه يعمل كل اللى هو عاوزه.. بلاه ماتش الزمالك والمقاصة.. مش عشان حتة ماتش واحد تتدخل يا خالد بك ويتوقف النشاط الكروى كله فى البلد.. حاسب.. فرامل.. يا سيادة الوزير!
تستحقها
تستحقها والله يادرويش.. أتحدث عن محمد درويش القابض على جمر مقالات كتاب جريدة الأخبار.. جائزة مصطفى وعلى أمين الانتماء.. الانتماء لمؤسسة أخبار اليوم.. أخيرا عرفت الجائزة الطريق إلى هذا الرجل الطيب.. المشاكس حين تستدعى الظروف.. اللين عندما تستوجب الظروف.. أعرف درويش أبو الدكتورة نورا.. والمهندس أحمد منذ عام ١٩٧٥.. عرفته بجد عندما كان - ولازال - صديقًا لزميلنا شفاه الله مجدى نجيب.. قرابة نيف وأربعين عاما هى عمر صداقتنا.. أغيب عنه شهورا لأجده على التليفون.. ماهنتش عليا يا ديميريل قلت أطمئن عليك.. هكذا هو درويش.. هكذا كان وهكذا هو الآن.. لا ينصرف من الأخبار إلا ومعه الطبعة الأولى.. مبروك يامحمد يادرويش.. يادرويش الأخبار بجد !
بلاش يا حكومة!
انتخابات المجالس المحلية ستجرى بعد صدور قانون الإدارة المحلية مباشرة.. طيب والقانون ده الحكومة ناوية تطلعه امتى يادكتور؟.. قبل نهاية سبتمبر المقبل أى قبل نهاية الدورة الحالية لمجلس النواب.. طيب ليه الاستعجال ده كله يامعالى وزير التنمية المحلية؟.. هذا هو السؤال الذى تمنيت - ومازلت أتمنى - أن يجيب عليه د. هشام الشريف.
انتخابات المحليات دى بروفة جنرال لانتخابات مجلس النواب.. السؤال الصعب هل ظروف البلد تجعل أحدا يفكر فى إجراء انتخابات المحليات.. هو أنتى ياحكومة.. يادولة.. مش خايفة إن النتيجة تكون وحشة.. ده مركز تدريب الإدارة المحلية بسقارة لتدريب قيادات المحليات مغلق من سنتين.. مش خايفين الإخوان والسلفيين وجماعة الاشتراكيين الثوريين والاشتراكيين اللى مش ثوريين والاشتراكيين الباذنجان يركبوها.. بلاش ياحكومة !