تنشر "الهلال اليوم"، رباعيات شعر عامية للشاعر أحمد عثمان من كتاب "حبات اللؤلؤ".

لو قابلت شخص ضاحك *** وفي عينيه إحساس سلام

يمكن الضحكة وسيلة *** يمحي بيها الآلام

حرية يعني الحياة *** لقمة وامن وبوح

من غيرها أنسى النجاة *** فجرك بقى مدبوح

عبده فتاوي إن حضر *** تسمع فتاوي كتير

خبير ف سطح القمر *** والنووى والجرجير

بقولك إيه ما سيبك من الألم *** وانهض ،ح نعد ليه

ولو فارقتنا أحزانا ***ح نخسر إيه

دا لسه الحلم أدامنا *** ح نجرى عليه

رغم إن الأم واحدة *** فراقتنا ألف حاجة

الحقيقة إن ف حياتنا *** أنت أخويا في البطاقة

سلام يا أغلى الحبايب *** عمري ما نساكم

خدوا جسدي تحت التراب *** وروحي وياكم

إن داس عليك الزمن *** يا ولدي قوم واقف

عمره ما كان الأسد *** من الخطر خايف