تنشر«الهلال اليوم»، رباعيات شعر عامية للشاعر أحمد عثمان من كتاب "حبات اللؤلؤ":
ياللي أنت عاوز تنول *** الرحمة من ربك
ارحم عباده دا هو *** اللي ف أديه أمرك
*****************
يا شعب لقمة تجمعك *** وماتش كورة يفرحك
أحداث خطيرة تمر بيك *** تبرك وتعد مطرحك
*****************
الطموح للروح وقود *** يدفعك فوق في العلالي
مهما كانت القيود*** انطلق وأصعد يا غالي
*****************
ياللي أنت عامل خواجة *** وواد بقيت إتيكيت
لما تكون عندنا *** راعى أصول البيت
*****************
اللي النجوم بصلته *** دايمًا ح يعلى لفوق
واللي في همومه غرق *** مسكين ما عمره يفوق
*****************
آذيت في نفسى وأنا بقطع *** ف سيرة الغير
بدل ما عيش ف أمان *** واصنع لنفسي الخير
***************
ياللي معادي الشباب *** فجر شبابنا جاي
بكره بدونهم سراب *** بيهم وطنا حي
***************
النقد ممكن يكون *** دافعة تعلينا
لو خدنا منه العبر *** لباقي خطاوينا
*****************
الشهيد بعد رحيله *** تاج حياتنا
واللي خانه شال في عاره *** ليوم مماتنا
*****************
سميحة سامحت *** جارتها رغم أسوتها
ردت جارتها الجميل*** وخربت بيتها
***************
امسك الراية يا ولدي *** من أبوك لحظة وداع
واعرف إن رحيلي راحة *** م الألم ومن الصراع
*****************
الحرية يعني نضال *** مش بكلام ولا مؤتمرات
كل شعوب الدنيا الحرة *** دفعوا تمنها تضحيات
*****************
إعدادك الخطة *** بعزم وبدقة
يجعل وصول هدفك *** ببراعة وبجودة
*****************
النية دي تخصك *** الناس ليها أسلوب
معقولة تعمل خير *** بطريقة فيها عيوب
********************
خالى قلبك ياد حديد *** وانطلق وكون شديد
تلقى كل الكون ف صفك *** وابتدى الفجر الجديد
*****************
صاحبنا قاعد إيده ع خده *** مستني تيجى الفرصة لعنده
الفرصة خدها بطل وجاهز *** وصاحبنا قاعد يندب حظه
*****************
مع بعضنا *** قادرين نحقق حلمنا
نصنع بفرحة عمرنا *** دنيا جميلة تضمنا
******************
صرخ مغيب وقال *** ليه قمتوا بالثورة
الحر رغم الألم *** قاله عشان بكرة
***************
الصحة تاج وأساس *** ترفع عليه أمانيك
من غيرها عجز وألم *** خليها ضي عينيك
***************
ياللي أنت ناسي الجميلة *** ودست ع المعروف
إياك تدق البيبان *** ساعتها مني تشوف
*****************
فارضين يعيش المواطن *** مكفي على حاله
ويدور ف ساقية ما يدرى *** إيه اللي جاراله
***************
ياللي أنت عاوز تحرك *** الدنيا من حواليك
أبدأ بنفسك تلاقي *** الكل إيده ف إديك