تنشر«الهلال اليوم»، رباعيات شعر عامية للشاعر أحمد عثمان من كتاب "حبات اللؤلؤ":
ياللي انتو عاوزين حريقة *** تحطوا فيها بنزين
بكرة النيران تشتعل *** تحرقلكوا الغاليين
***************
حكى أبو لمعةعلى مسابقة*** كانوا بيشيلوا فيها حديد
ساب الكل يشيل أوزانه *** ومسك القطر ورفعه بإيد
***************
يا صحبة الخير والنبي **** سعيد وسطيكم
الله يديم فرحنا **** وبكرمه يحميكم
***************
أنا رزقي ليه يا بشر *** بيقرره الحاكمين
بصينلي ليه في الجنيه *** وف كرشهم ملايين
***************
جنابه جايب عربية زيرو *** وبالسريع بهدل حالتها
لو فى الجنية تعب جنابه *** كان أكيد عرف قيمتها
*****************
لما الدنيا بتأسي عليا *** عارف إن لينا الله
بلجأ ليه ويفكلي كربي *** هو القادر جل عولاه
***************
وإيه تفيد الخطط *** والعزم مش موجود
خطة وإرادة حديد *** قادرين يخطوا سدود
****************
حرية يعني اختيار *** ما بين حاجات وحاجات
لو فرد قرر لنا *** يبقى قرارنا مات
***************
ملاذ وآمن وبغسل فيه *** هموم نفسي
بطلق نجوم الأمل *** للجاي من بعدي
********************
أهو ماشي يتألم *** ف الدنيا مش عارف
إن العلاج جواه *** لكنه مش شايف
***************
بعمل الخير بنتغير *** ونطلق أحلى ما فينا
ونزرع في قلوب الأحباب *** ذكرى عشان ما ينسونا
*****************
معيوب وعاوز يكون *** الآمر الحاسم
مع إن نفس الزبون *** في بيته مش حاكم
*****************
أوعى تصدق كلمة لفاشل *** إن المستقبل مقفول
المستقبل له أبوابه *** وأنت أكيد ح تلاقى حلول
*****************
اللي آجل حلم عمره *** عاش حياته في الظلام
أتسرق أدامه فرحه *** قال وإيه ... بيقول حرام
*****************
كذبوا وقالوا الشعوب *** واخدين على الذلة
مع إن نفس الشعوب *** صنعوا تاريخ أمة
********************
المرن دا غصن اخضر *** قلبه مليان بالحياة
يتنى للريح ويرفع *** جبهته يكمل خطاه
*****************
ياللي أنت سايب الفرص *** تهرب بتبكى ليه
غيرك عملها أساس *** بنى حياته عليه
*****************
الفوز بيتحقق *** من قبل ما تبدأ
المعركة بكتير
لبطل وكان جاهز*** قابض على المبدأ
رغم التحدى خطير
وللى يكون خايف *** ف رعبه متخندق
اختار هزيمته مصير
********************
حلمت بيك ف الكبر *** تبقى سند لي
ودعتني ف الطريق *** ورحلت يا عني
*****************
نفسى يا ولدي تكتشف *** فروقات خطيرة
بين اعتمادك ع البصر *** وعلى البصيرة
*****************
عبده فتاوي إن حضر *** أسكت ووسعله
ماكنة كلام وهطل *** بس اللي يسمعله
***************
ساعة م الفرح يغادرنا *** نصمم إن نختلقه
ولو في تحدى في حياتنا *** ومالهوش حل، نبتكره
*****************
سعيد كآبة دا زينة *** قاعدة الأصحاب
خبير ف غم النفوس *** والدنيا عنده هباب
***************
أنت عارف يا أبويا *** أد إية غالى في حياتي
بس من فضلك سيجارتك *** راح تكون سبب وفاتي