نجح في أن يكون صاحب بصمة مختلفة في عالم الغناء، هو الفنان محمد فؤاد، الذي يحتفل اليوم الأحد الموافق 20 ديسمبر بعيد ميلاده الـ59. ولد "فؤش" في محافظة الإسماعيلية، وعاش شبابه وطفولته في منطقة عين شمس.

حكى فؤاد، خلال استضافته في برنامج "صاحبة السعادة" الذي تقدمه الفنانة إسعتد يونس، كيف بدأت علاقته بالموسيقى والغناء، وأبرز ابمواقف التي لا يمكن إن ينساها، وبينها تعرضه لموقف محرج في طفولته، عندما اتفق معه صديق على إحياء حفل زفاف نادي اسمه 6 أكتوبر في حلمية الزيتون.

يقول فؤاد "كان لسه النادي جديد وواحد صاحبي صعيدي ساكن في عين شمس، وكانت منطقة شعبية جميلة فيها من كل نوع صعايدة وفلاحين ونوبيين، صاحبي صعيدي وعيلته ملتزمين بكل حاجة صعيدية رغم انهم عايشين في القاهرة، اسمه حسني كان غاوي يلعب طبلة، والفرح كل الناس جاية تحضره من البلد، بالنبابيت في ايديهم وانا عامل فيها اجنبي وبغني انجليزي، وبغني غلط اصلا اكتشفت لما كبرت ان نص اللي كنت بغنيه زمان غلط".

يضيف "اتفقوا معاه عايزين فرقة عشان الفرح وكان فيه فنان كبير متقال عنده اغنية اسمها الفراولة بيتضايقوا منها ومكنتش أعرف، وكلما واخدين الحكاية جد لسه ببدأ، لقيت راجل ضعيدي بنبوت كبير مستغرب شكلنا، شكلنا مش عاجبه ابتدت الموسيقى وبغني انجليزي الراجل بص لي كده وعمال يقول الواد ده أجنبي ولا هندي، بقول أغنية far away، افتكرها فراولة قالي هتتريق عليا ياض، حسني جاي يحوض يلبس الشومة في دماغه نطيت على ورا المسرح على حمام السباحة، فاكر ان دي ارض  كلنا خرجنا مبلولين، مروحين بيتنا وبنجري في الشارع، كان موقف له معزة خاصة عندي".

وتحدث محمد فؤاد عن موقف محرج آخر تعرض له في بداية طريقه بعالم التمثيل، أثناء تصوير فيلم "القلب رما يعشق" مع الفنانة سهير البابلي، وعنه قال "أول ما قالولي فيه مشهد بفكلها من شعرها بنسة، بقولها عيشي الحياة مكنش عندي جرأة احط ايدي على شعرها، عمري ما عملت كده مع واحدة ست، والست كانت كل ما ادخل البلاتوه الاقيها قمة الاحترام، بتعاملني زي ابنها فيه قدسية كده غريبة، تجبر كل الناس تحترمها".

واستطرد "اعمل كده ازاي اتوترت بشكل، وكنت مكسوف طلعوني فوق وهي طلعتلي بقى مش عايز اقول خمس دقايق بالظبط نزلت أصور المشهد وصورته، عملت حركة عبقرية خلتني صاحبها في خمس دقايق كاني اعرفها من 30 سنة، اول ما دخلت شتمتني".

محمد فؤاد شارك في بطولة عدد من الأفلام السينمائية، أشهرها فيلم "إسماعيلية رايح جاي" والذي حقق نجاحا كبيرا وقت عرضه، شارك فيه محمد هنيدي، خالد النبوي، حنان ترك، كريمة مختار، وحمدي غيث.