علق الفنان أحمد العوضي، على نجاح مسلسله "اللي مالوش كبير" في شخصية "سيف الخديوي" وحب الناس للشخصية رغم كونها تعكس شخصية بلطجي قائلاً : "ده كرم من ربنا إني عملت الشخصية دي والناس حبتها .. وأنا دائماً لما بعمل شخصية بحاول أعملها بطريقة معينة تكون أقرب للحقيقة".
وأضاف في مداخلة هاتفية خلال برنامج " كلمة أخيرة " الذي تقدمه الإعلامية لميس الحديدي على شاشة " إكسترا نيوز " خلال شهر رمضان قائلاً :" وأنا أصلاً من منطقة شعبية والناس عارفة كده وتعاملت مع صنوف مختلفة من شخصيات البشر ولحد النهارده وأنا دائماً ببقى موجود في الشارع ومحتك بالناس ومش منعزل فقابلت أنواع مختلفة من البشر ".
وتابع: " عشان كده أنا بقول أن شخصية سيف الخديوي موجودة بالفعل.. "الكاركاتر" على بعضه بطريقة كلامه بخواتمه وحركات إيده شخصية موجودة بالفعل في الشارع .. المجهود بقى اللي الواحد بيبذله في الشخصية أنه يصنع ليها كلام أو جمل يخليها عالقة في أذهان الجماهير وده شغل الممثل".
وحول جمل "وحش الكون" و"على الله حكايتك يا ست" قال العوضي : "من أول مسلسل كلبش قلت فيها جملة " من أجلك أنت " الناس أخدتها مني مما جعلها دارجة في الشارع .. دلوقتي بقى أنا بعمل العكس يعني بخلي الناس هيا اللي تاخد من عوضي ".
وأبدت الحديدي إعجابها بجملة " يا قطر جيلك " ليرد العوضي قائلاً : " الجمل هي اللي عملت طعم للشخصية اللي الناس شافتها والجهد في خلق الجمل هو جهد الممثل ".
وحول خطورة تعلق وحب الجمهور لشخصية البلطجي قال العوضي : " لسه هنشوف اللي هيحصل ومش هحرق الأحداث".
وحول تقديم النمط الجديد لشخصية البلطجي قال : سيف الخديوي متعب في الكلام لأن الجمل مش مهروسة ومش متقالة قبل كده".
وحول العمل مع زوجته ياسمين عبد العزيز قال : "أحلى حاجة في الكون والناس بقت دلوقتي كلها تقولها يا وحش الكون".
وتعليقاً على مشهد الفرح وتأثيره عليهما خاصة وأنهما لم يقيما فرحاً في زواجهما الحقيقي قال العوضي : "كنا مبسوطين جداً وتعاملنا مع الفرح أنه فرح بجد لأن كان فيه ناس جاية تجامل بجد زي عمر كمال ومحمد عبد السلام حسيت إنهم جايين يجاملوا عوضي وياسمين وكأنه فرحنا بجد مش شغل، فكنت حاسس أنه فرح وكأنه فرحنا".