تصدرت الفنانة  حورية  فرغلي  محرك البحث  "جوجل"  بسبب تصريحاتها من خلال لقائها في برنامج "التاسعة" المذاع علي شاشة قناة الأولي المصرية، الذي يقدمه الإعلامي يوسف الحسيني.

وكانت أبرز تصريحات الفنانة حورية فرغلي،  أنها طلبت من  الدها عبر اللقاء، أن يتصل بها: قائلة "بابا، هو زعل إني مأخدتش رأيه عشان أسافر وأروح أمريكا وأعمل العملية، روحت من غير ما أقوله.. مش بقول إنه وحش، وأنا غلطانة، أنا بعشقه وبموت فيه، وبقول له آسفة إني ما أخدتش رأيك وأرجوك متزعلش مني وكلمني عشان وحشتني".

واستكملت "فرغلي" حديثها عن والدها: "مكنتش عاوزة أخوفه عليّا عشان أنا عملت أكتر من عملية ومنجحتش، وده كان آخر أمل ليّ، ومكونتش عايزة أشيله هم ولما نجحت وصورتي وصلت له كنت متخيلة إني يكلمني بس مكلمنيش لحد دلوقتي".

وأشارت حورية فرغلي أن : "رانيا محمود ياسين ومدام لبلبة صحابي في ناس كتير كلموني ومكنش ليّ علاقة بيهم، وقابلت مدام مادلين طبر، وكلمتني مدام لطيفة من دبي، وصفية العمري ونبيلة عبيد وسهير رمزي ونجوى فؤاد وشريف منير وإيمان الحصري وسيد علي والمطربة أمينة".

وقالت أيضا إن علاقتها بزملائها في المهنة، كانت مقتصرة على العمل دائمًا، موضحةً: "أناعمري ما حد عزمني على عيد ميلاد أو فرح أو فطار ولا عمري اتعزمت على حاجة، أنا بتكسف زيادة عن اللزوم من الخطوة الأول"، حيث قالت : "أنا حصلت على جائزتين فقط في مشواري، ولا بيتقدم لي دعوات ولا بيجي لي أي دعوات في مهرجان الجونة أو غيرها، ماحييني تماما".

وتابعت: "الفن شغلانة شلل مش مواهب، دايما بيبقوا صحاب وشلل مع بعض، وبيشتغلوا مع بعض في أعمال معينة، وأنا بعد الشغل ليّ حياتي، ومحدش فيهم بيكلمني ولا بيعزمني على حاجة، ولو حد فيهم كلمني أو عزمني على حاجة هروح لأني أحب ده".

قالت: "أنا ضد الشللية، مفيش حاجة اسمها شلة حورية فرغلي، أنا فنانة وسط فنانين كتير، ومن حق كل الفنانين أنهم يشتغلوا سواء كانوا مبتدئين أو نجوم، أنا شغلتي أني أمثل قدام الكاميرا مش مين هيبقى زميلي في المسلسل أو الفيلم".

وأكدت "فرغلي"،  "أنا حفيدة فرغلي باشا وأنا من عيلة كبيرة، ووالدي دكتور كبير وأمي من عائلة كويسة، وأنا متربية كويس، لكني بعيدة كل البعد عن التناكة، أنا بقول للبواب حضرتك، هبقى تنكة إزاي".