تشتهر محافظة الدقهلية بانتشار بعض الحرف اليدوية بين قراها ومدنها المختلفة ، وتعد مدينة المنصورة وبعض القرى التابعة لها من أشهر مدن المحافظة في صناعة الديكورات من فرم الجبس، وتعد هذه الصناعة من الصناعات البسيطة التي يحبها ويعشقها العاملون بها ،وذلك لبساطتها وسهولة صناعتها وقلة التكلفة بما يقارن بالعائد من الربح ،وايضا لجمال إنتاجها وأناقة شكل المنتج النهائي.

والتقت بوابة "دار الهلال" بماهر محمد صاحب ورشة لصنع ديكورات من فورم الجبس، الذي قال:" أنا شغال في المجال ده من سنين ، من أيام ما كنت لسه طفل صغير ، واتعلمتها من ناس اكبر مني ، وحبيت الصنعة ، وقررت بعد فترة إني افتح ورشة في بيتي ، وفعلا فتحت الورشة وكمان علمتها لابني وهو دلوقتي بيساعدني وشغال معايا وانا معرفش شغلانة غيرها ، والطلب عليها كتير والحمد لله ،وده لأنها تستعمل ديكور في المنازل والمساجد ،وديكور خارجي في وجهة بعض المحلات للزينة"

واضاف: لفورم الجبس أشكال مختلفة وكتير منها الكرانيش ومكانها في زوايا المساجد والبيوت ،ومنها اللي بيوضع في السقف ، والمثلثات الصغيرة على أسطح المساجد من الخارج، والتماثيل الكبيرة ومكانها في مداخل البيوت ،والصغيرة منها داخل البيوت وعلى المكاتب ،والفازات اللي بتتصنع من كسر البلاط ،وكرانيش صغيرة بتتصنع منها ديكور شاشة العرض في المنازل وغيرها. وأضاف: وصناعة فورم الجبس تمر بمراحل عشان توصل لشكلها النهائي وهي: - مرحلة خلط الجبس بالماء وتقليبه كويس. - تاني مرحلة وهي صب الجبس على الفورمة وتغطية كل جزء منها.

 تالت مرحلة فرد الكتان على الجبس واحاول اساويه بايدي كويس ،وده عشان يقوي من متانة الفورمة الجبس ويقوي من صلابتها ومتتكسرش. -رابع مرحلة اكمل صب الجبس على الفورمة وتغطية الكتان كويس وأساويه بأيدي رايح جاي عشان ميظهرش من وسط الفورمة .

- خامس مرحلة التجفيف.. ينشف في الهوا. - والمرحلة الأخيرة وهي فك الجبس من الفورمة. وبكده يكون ظهر لينا فورمة الجبس بشكلها النهائي،وتكون جاهزة على التركيب.