كشفت فتاة عبر صفحتها الشخصية على موقع التواصل الاجتماعي فيس بوك، عن واقعة إساءة إلى أطفال أيتام في دار في الشيخ زايد، مطالبة بأي تحرك لإنقاذ الأطفال.

وقالت الفتاة في منشور تداوله عدد من مستخدمي الموقع الإلكتروني: "ياريت الفرحة كملت، يوم من أكتر الايام اللي حصلت فيه أحداث سيئة #زيارة_دار_الأيتام، كمية الوجع والقهر وقله الحيلة مننا ومن الأطفال اللي فعلًا لاحول ليهم ولا قوة رايحين مبسوطين وبجد جوانا استعدادات كتير تفرح الأطفال دي اللي موجودين في #دار_الفتوح_الخيرية الشيخ زايد الحى ال11".

وأضافت :"الأحداث بالتفصيل كالتالي.. وصلنا الدار الساعة 1 سألنا على الأطفال قالولنا بيتغدوا والمفروض ان الزيارة من 12 ل 5، لحد الساعة 4 الأطفال بتتغدى المشرفات بالكامل مشفناش منهم أي ترحيب ولا حتى تقدير بيكلموا بعض بعنيهم وفاهمين بعض جدا كلنا لاحظنا وبدأنا نتكلم ونطلب الأطفال خرجلنا تقريبا 5بنات سنهم بين ال 6 وال7 فى الأول افتكرناهم خرس من كتر ما حاولنا نخليهم يتكلموا ولما بدأت واحدة منهم تتكلم وتندمج لقينا (تبريقات) والبنت في لحظة اتخدت مننا بدأنا طبعا نقلق سألنا الأطفال كلتوا قالوا لا يعلم ربنا كم الوجع اللي فيا وأنا بكتب البوست ده".

وأضافت: "في كل طفل خربوش في وشه أو رقبته ولما بنسأله مين عمل كدة بيجروا مننا طلبنا نتصور مع الأطفال صورة جماعيه لينا وليهم ولاولادنا كمان اللى كانوا معانا قالولنا ممنوع طلبنا ندخل غرف الأطفال اللى مخرجوش قالولنا ممنوع الأطفال بالكامل واضح عليهم حاجات كتير يفهمها اى اب واى ام بيزعل ابنه وبيوصل لمرحلة ماقبل البكاء مقدرناش نسكت واحنا شايفينهم كدة واتكلمنا بالعقل وراعينا وجود الأطفال وسطنا بس اتفاجأنا ان فى بودى جاردات ".

وتابعت :جايلنا دول بقا اللى بيخوفوا بيهم اللى بيتكلم بس بفضل الله كنا مجموعه محترمة وعرفنا نتكلم ونردهم ، خرجنا وقلوبنا بتتقطع على الأطفال دى مش عارفين نعمل ايه غير بوست نكتبه ونطلب من أكبر عدد يشيرة لعل وعسى نكون سبب رحمه للأطفال اللى هناك هنروح تانى وتالت ورابع ومش هنغضب لنفسنا هنفضل نروح لحد مانلاقيهم أطفال طبيعيه ولحد ما المشرفين دول يحسوا انهم مش أيتام وان ليهم حد يهتم بيهم ويسأل عليهم، حسبنا الله ونعم الوكيل فى كل اب وام هان عليه ابنه يرميه، حسبنا الله ونعم الوكيل فى كل ظالم قادر يرحم وقسى قلبه".

واختتمت المنشور بقولها :"روحوا يا جماعه من غير هدايا من غير تبرع من غير حاجة تصعب عليكم زيارتهم روحوا خليهم يخافوا من زيارتنا ليهم خليهم يتفاجئوا بينا في اي وقت عندهم والله الوضع هيختلف، عدد الأطفال هناك 23 طفل عاوزين 23متطوع ومتطوعة يروح كل واحد يقعد مع طفل لعل وعسى نكون نجدة للأطفال دي".