المرأة التي تطالب بالمساواة بالرجل تظلم نفسها..! وهى معتقدة إنها تحقق العدل بين نصفي المجتمع.
نتكلم ببساطة ونقول ياست الستات أنتى ربنا ورسوله أعطوكي حقوق ومميزات تخليكي فى مكانة أكتر بكتير من أى راجل، ليه أنتى بقى بتقللى من نفسك وتطالبى بما يسمى "المساواة بين الرجل والمرأة"..!
ليه ربنا جعلك فى مكانة ومنزلة أفضل وتطالبى بما هو أقل.. تيجى وحدة تقولى أن الراجل بياخد كل الحقوق والمرأة مش بتاخد حاجة، وإذا خدت بتاخد على دماغها أيون على دماغها..!
هرد وقولها كلامك يأكد وجهة نظرى إزاى..؟
لما الراجل أو المجتمع يظلمك متكمليش أنتى الظلم وتظلمى نفسك بطلب المساواة لأنك أعلى منزلة وشأن من الراجل وأنتى مش عارفه، ربنا جعل الجنة تحت أقدامك وأنتى أم وجعلك سبب فى دخول أبيكى الجنة وأنتى أبنه، وربنا سبحانه وتعالى وصى عليكى فى كتابة، ورسوله صلى الله عليه وسلم وصى عليكى فى أحاديثه، تيجى معاليكى بعد كل العظمة دى والتكريم تقولى "مساواة"..
مساواة فى عينك يا شيخة.. المرأة أو الست بتتمتع بقوة وقدرة مفيش نصها عند الراجل بدليل أن الحمل والرضاعة وتربية الأطفال من مهام المرأة ودا أكبر دليل على صبرها وقوة تحملها، ييجى راجل عامل فيها ناصح ويقول وهى المرأة مخلوقة ليه غير عشان كدا..؟
نقوله ونفهمه من غير تعصب، أن الست أتخلقة عشان ربنا عايز كدا وله حكمة زى ما خلقك وخلق الكون كله وجميع المخلوقات لعبادته ولحكمته، ومش بس كدا لا.. ربنا خلق الست عشان تكمل الرجل وتشاركة وجعلها هى اللى تحمل الأبناء وتلد وترضع وتربى، لأنها هى الوحيدة اللى تقدر تتحمل كل العذاب والشقاء والآلم دا وتقابله بكل حب وصبر، وأكبر دليل على قوة صبر وتحمل المرأة هى أنها بتتحملك وتصبر عليك وتشيلك وتشيل همك وتشوف طلباتك، وتتأمر عليها وأنت أبوها وأخوها وزوجها وأبنها.. لو مش عندها قوة تحمل وصبر كانت أتحملتك كدا..؟!
ومش هقولك أنت تقدر تحمل تسعة شهور وتقوم بالولادة والرضاعة وتسهر بالطفل وتغيرله وتحميه وتآكله و..و..و.. خالص، لكن هقولك شوية أسئلة جاوبهم لنفسك:
- لما الأولاد يعملوا دوشة وشقاوة وأنت قاعد فى البيت مين اللى بيسيب البيت وينزل أو يدخل ينام ويقفل على نفسه أنت ولا الأم..؟
- لما يكون أبنك تعبان وأمه تعبانة، مين اللى بيسهر يراعى الطفل وبيديه الدوا، أنت ولا أمه اللى تعبانة..؟
- وأنت بتآكل والطفل محتاج يغير الحفاضة ويتشطف مين بيقوم من على الآكل لعمل الازم، ويسيب الآكل وممكن ما يآكلش اصلا، أنت ولا الأم..؟
- لما زوجتك تكون مريضة وأنت راجع من الشغل تلاقى الآكل جاهز وطلبات الأولاد متلبية.. مين اللى بيقوم بكل داعلى حساب نفسه أنت ولا المدام..؟
دول كام سؤال كدا على الماشى ياريت الراجل يجاوب عليهم بصدق مع نفسه لنفسه، قبل ما يقول أنه هو اللى بيتحمل أكتر وأنه بيشتغل ويشقى ويتعب، وهو ميعرفش أن التعب والشقى والمعانة الحقيقية هى تربية الأطفال التى لا يعلم عنها شئ.
أيوه لا يعلم عنها شئ، لأن الراجل لو يعرف يعنى أيه تربية أطفال عمره ما يقلل من دور الست فى حياته، وكتير من الرجال فاكرين نفسهم أنهم جابوا الديب من نديلة عشان بينزلوا يشتغلوا والست قاعدة فى البيت، ويعتبروها أنها مرتاحة ومتهنية، وهما اللى شقيانين وطالع عينهم يا حرام..
واللى موهوم وعايش الدور دا ومصدقة أحب أقوله: "أنت فى غيبوبة ومش فاهم حاجة أو فاهم وعامل عبيط.."، من غير زعل دى الحقيقة لأن الست حتى لو مش بتنزل تشتغل ومتفرغة لتربية الأولاد، فهى اللى طالع عينيها وروحها كمان لأنها مش قاعدة فى البيت تتفرج على المسلسلات والأفلام، والشغاله اللى معاليك مجبتهاش اصلا بتعملها الآكل وتجيب لها العصير والقهوة، والدادة هى اللى بتراعى الأولاد، لأن ببساطة هى الأم والشغالة والدادة والممرضة والحرس الخاص والأرجوز والبليتشوا وكل الشخصيات اللى يحتاجة الأولاد وأبو الأولاد، والأهم من كل الكلام دا أنها بتربى إنسان له كيان، مش ساعات تقضية شغل والسلام ياعم التعبان..!
نرجع تانى لموضوعنا الأساسى وهو أن الست اللى تطلب المساواة بالرجل بتظلم نفسها، وعليها أنها تطالب بحقوقها اللى ربنا ورسوله أعطوها لها وهى أكتر بكتير من المساواة اللى عامله زى اللبانة فى "بوأ" اللى ترددها من غير وعى.
خليكى قوية معتزة بنفسك متمسكة بحقك وأنتى مش هتحسى أنك أقل من الرجل، المرأة اللى بتتنازل عن حقها هى اللى ماتستهلوش, مفيش حد بيجيب حق حد من غير ما يطلب منه، أنتى قوية ولكى مالكى وعليكى ما عليكى، وبتقومى بأكبر وأهم وأفضل دور فى الحياة، فلا تقللى من نفسك ولا تستسلمى ولا تظلمى نفسك حتى لا يظلمك أحد، ودا مش كل الكلام لكنه مجرد رأى.