تداول رواد مواقع التواصل الاجتماعي خلال الساعات الماضية، مقطع فيديو لسيدة في أحد البرامج التليفزيونية، تتحدث عن علاقتها بزوجة ابنها بشكل اعتبره الكثيرون "مستفزًا".

وخلال الفيديو قالت السيدة :" ابني لما جه يتجوز جه قالي أنا بحبها قلت له حبها واتجوزها بس فيه شروط، إنها تعيش معايا في نفس الشقة لأن باباه توفى فأصبحت أنا وهو بس ومعنديش أولاد غيره، فقلت لازم أنه لما يتجوز لازم مراته تكمل الأسرة لكن مش تاخده ليها خالص هنفطر ونتغدى ونتعشى مع بعض وآخر الليل عايزة تطلع شقتها هي حرة واتفقنا على كده، وأول ما وصلت البيت كل الاتفاق راح وحسيت انها بدأت تاخده مني".

وأضافت :"كان لازم أعلمها الأدب خليته يقعد معايا تحت يفطر ويتغدى ويتعشى معايا، عايز يطلع لها يبقى في الساعتين اللي بكون نايماهم الضهر وقبل ما اقوم من النوم يكون جنبي مابقاش صاحية واحس ان انا لوحدي".

وواصلت السيدة :" انا معنتش زي الاول، السن معادش يسمح اني اقعد في شقة كبيرة لوحدي، لو انا تعبت بالليل مين يلحقني ؟ انا مقدرش اعيش من غيره، مقدرش انام في البيت من غير ما يكون صوت نفسه فيه اتعودت على كده وهو كمان اتعود، انا متعلقة بيه وهو كمان متعلق بيا، انا بالنسبة له كل شيء متعود يحكيلي على كل اللي بيحصل في يومه من اول ما يروح الشغل لحد ما يرجع".

وهاجم رواد فيس بوك السيدة، فقال أحدهم :" لان بنت الناس اللى اخدتوها دى عشان تعيش هى كأنها عايشه لوحدها مش متجوزة هى كمان ليها اهل وكانوا متعودين على وجود بعض وانتى كده حرمتيها منهم على اساس حياة جديدة ومع ذلك خلتيها عايشه لوحدها ! ايه الانانيه دى بجد كل حد بيعمل بيت جديد بببقي عايز يعيش حياه على مزاجه هو مش على اللى سبقوه هى نفسها لما اتجوزت عملت بيت اكيد بعيد عن اى تحكم من اى حد ومن وقت للتانى كانت تزور حماتها او امها ليه بتعمل هى كده فى بنات الناس وبمبرر!!".

وأضاف آخر :" كتر الف خيرك بتسمحيلوا يروح شغله وبيطلع ساعتين لزوجته ده ايه الافراط ده وانتي بقي ياطنط جوزك كان عايش معاكي ولا كان نفس الوضع ده ولو كان ربنا اداكي بنت كنت هتسمحي لجوزها وامه يعملوا معاها كده ولا كنتي هتأكليه بسنانك ليه بقينا بنرضي لغيرنا اللي منقبلوش علي نفسنا اتقي الله في ابنك وزوجته كوني لها أم قبل الحماه تكن لكي ابنه قبل زوجه الابن".

وتابعت أخرى :" ياطنط متزعليش نفسك خليه قاعد جمبك بدل متبهدلوا بنات الناس معاكم ويجيلهم عُقد نفسية بسببكم وبسبب التربية الناقصة بتاعت حضرتك دي يعني هو داخل بمجهوده ولا ايه حضرتك مش فهمة خليه يوفر مجهوده لحضرتك تفطروا وتتعشوا وتتغدوا ويستشورلك القُصة بتاعتك عادي ومتبهدليش بنات الناس".