حرص السيناريست عمرو محمود ياسين، على مساندة الفنان تامر حسني، ضد النجمة حلال شيحة، بعد أن هاجمته واتهمته بعدم الوفاء بالوعد.

وقال عمرو ياسين، عبر صفحته على موقع التواصل الاجتماعي فيسبوك: "بجد رد تامر حسني في غاية الاحترام والذوق".

ونشرت حلا شيحة على صفحتها الرسمية صورة تحمل عبارة "مش أنا"، وعلقت عليها بقولها: "أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة أيام مباركة وخصوصاً بعد آخر بوست نزلته ووضحت فيه انا ايه.. واتفاجئت اكتر خصوصا بعد وعد تامر حسني ليا وتأكيده انه هيحترم رغبتي وبعض الطلبات اللي طلبتها منه بكل احترام وود الصيف اللي فات واكدلي انه هيحترم رغبتي".

وجاء رد تامر حسنى على صفحته الرسمية على فيس بوك قائلا " للتوضيح بما إنك يا حلا كتبتي بوست وأشركتي الجمهور الكريم معانا، بدل ما كنتي تكلميني شخصيا، ونتناقش بيني وبينك، فأنا مضطر أرد هنا برضو، أولاً أنا عمري ما وعدتك إن الكليب مش هينزل، دا محصلش أصلاً يا حلا، مش أنا خالص اللي أوعد وأخلف، والحقيقة إني احترمت كلامي معاكي، ووعدتك أشيل مشاهد تانية طلبتيها، وشيلتها بالفعل، وشكرتيني عليها، ولو حابة تفتكري المشاهد اللي اتشالت، بعد إذنك روحي شوفيها في المونتاچ، عند الأستاذ عمرو عاكف، أو كلميه يبعتهالك، كلها موجودة".

وتابع: "وبعدين الفيلم بقاله 3 أسابيع في السينمات، والكليب موجود جوا الفيلم، هو بالنسبالك الحرام، إننا ننزل الكليب على اليوتيوب بس!! إنما الكليب يتشاف جوا السينمات عادي؟؟ منطق غريب فعلاً يا حلا".

وواصل: "وبعدين هو مش انتي اللي مضيتي عقد، وتقاضيتي عليه مبلغ كبير، عشان الدور دا بعينه!! هو مش انتي اللي صورتيه ومثلتيه بنفسك، وبمنتهى الرضا، ولاّ حد أجبرك؟!".