يبدأ بارتفاع درجة الحرارة.. أطباء يحذّرون الأمهات من مرض جديد يصيب الأطفال
حذّر عدد من الأطباء على مواقع التواصل الاجتماعي من زيادة عدد إصابات الأطفال المرضى بفيروس الهيربس.
وأكد الأطباء، أهمية الحذر وضرورة منع عادة تقبيل الأطفال للحد من انتشار هذا المرض الذي يسبب ارتفاع درجة حرارة الطفل بشكل غير طبيعي مع ظهور طفح جلدي في أماكن معينة من جسم الصغير.
وتداول العديد من الآباء والأمهات منشورات عن تجاربهم مع إصابة أطفالهم بالهيربس خلال الأيام الماضية، في حين تداول الكثير من مستخدمي السوشيال ميديا منشورات للأطباء تكشف عن طرق الوقاية والعلاج من المرض.
ومن المنشورات المتداولة بكثرة على لسان أحد الأطباء جاء فيه :"سخونية عالية من غير أي سبب.. كان كويس وزى الفل وفجأة سِخن ورجع.. وبنحافظ في الأكل اللي من برة ومفيش أى حاجة ساقعة.. سيناريو معظم العيال اليومين دول.. الهيربس رجع تاني بشراسة يا جماعة.. فيروس بيعمل حرارة شديدة فوق ٣٩ أو ٤٠.. تستمر ليومين تلاتة قرح تظهر في الحلق وممكن حول الفم وممكن التهاب شديد في اللثة لدرجة تغطي على السنان وتجيب دم".
وأضاف المنشور: "دا علاجه خوافض وبخاخ للفم فقط وممكن إضافة مضاد فيروسي في بعض الحالات.. ممنوع استخدام المضادات الحيوية الدور معدي جدا.. خدوا بالكم الطفل اللي يسخن يشرب فى كوباية لواحده ومعلقة لواحده وفوطة لواحده.. وينام بعيد عن اخواته، والأطفال اللي بيروحوا الحضانة وبيختلطوا كتير يا ريت تستريح فى بيوتهم اليومين دول.. الأطفال بتخلص من دور تدخل فى التاني".
وقال طبيب آخر: "الهيربس دا ڤيروس بييجي للكبار والأطفال سواء المناعة قوية أو ضعيفة ويبقى كامناً في الجسم ويتجدد مع نزلات البرد وضعف المناعة.
وتابع: "أهم نصيحة إن الطفل مياخدش مضاد حيوى لو جاله هيربس وإلا مناعته هتقل والڤيروس هينتشر أكتر والقرح بتزيد أكتر، ومن أعراضه فقدان الشهية، ألم بالفم، ريالة، قرح بالفم، ارتفاع درجة حرارة الجسم، وممكن يسبب نزلة معوية ڤيروسية.
