نشرت شابة مشكلة غريبة من خلال إحدى الصفحات على موقع التواصل الاجتماعي فيسبوك، تحدثت فيها عن فكرة غريبة روادتها لإتمام زواجها ممن تحب، حيث فكرت في بيع كليتها لشراء مستلزمات الزواج، ما تسبب في هجوم رواد السوشيال ميديا عليها.

وجاء في الرسالة :"انا مخطوبه وبحب خطيبي وهو كمان واخدين بعض ع حب بقالنا سنتين ونص مخطوبين وضغط من اهلي ان يدوب كدا ونتجوز بس هو بحسه واقف ف مكانه وبصراحه مش بايده بس انا قررت اتبرع ب كليتي بس مش عارفه الاجرأت الي هتم وكدا واروح لمين عاوزه بس مبلغ يجوزنا انا نفسيتي زفت وخلاص بفكر ف الانتحار مباتش قادره مع اني من عيله كويسه ماديا بس مقدرش اقولهم جوزوني بس هضحي علشانه وشايفه انه يستاهل ولا ابعد عنه لان مش شايفه اي خطوه هتتاخد".

ومن التعليقات التي جاءت على الرسالة :" اصبرى كده كده هياخد طحالك يامنيله متبقيش خسرتى طحال وكليه"، و"كليتك ايه ي ست هو حلق متستعجليش عشان بعد الجواز كده كده في أعضاء كتير بتخرب"، و"فعلا لو قصة حقيقية تبقى كارثة لو واحدة بتفكر بالشكل دة !!! إنتي تملكي إيه من جسمك عشان بالسهولة دي تبيعيه بالرخص كدة وعشاان إيه ؟؟ بعد كدة هتترمي رمية الكلاب أما تتعبي وماتقدريش تخدمي نفسك وبيتك وتقولي ياريت اللي جرى ماكاان !! هي الدنيا اتقلبت والا اييه ،،لو شاريكي هينحت فالصخر عشان يتجوزك غير كدة خليكي معززة مكررمة فبيت أهلك احسن"، و"طيب مايبيع هو كليته عشان يجوزك ولا هو اللى اقترح عليكى اختراع جميل ده يابنتى والله جدعنه فى زمن ده هتقابليها بقله اصل".

ومن التعليقات أيضًا :" ثواني بس.. انتى عايزة تتبرعي بكليتك قصدى تبيعي كليتك عشان تتجوزي؟؟؟ ياختي بلا جواز بلا نيلة.. في واحدة هنا كانت باعتة مشكلة انها اتبرعت لجوزها بكليتها وبمجرد ما تعبت شوية رماها واتجوز واحدة تانية.. اهدى يا ماما بلاش هبل"، و"اتبرعي وخدي الفلوس طبعا واديهاله ويعمل باصله ويعزمك على فرحه اول واحده"، و"هو انتوا بتلاقوا الكلاوي بتاعتكم في الشارع"، و"وبعد ماتتعبى وصحتك تروح يقولك مع السلامة اشوف واحدة سليمة طيب ممكن هو يتبرع بكليته احسن واكيد انت هتقفى جمبه ومش هتسبيه وتمشى ياجماعة يسيروا ولا تعسروا بلاش المغالاة فى أمور الزواج".