تداول عدد من رواد موقع التواصل الاجتماعي فيس بوك منشورًا كتبه طبيب عظام يدعى سعيد خليفة، تحدث فيه عن موقف جمعه بطفلته التي تبلغ من العمر 5 سنوات، ليطالب الآباء بحسن التعامل مع بناتهم والمبالغة في تعزيز ثقتهن بأنفسهن من خلال العبارات اللطيفة والإثناء على مظهرهن، ما أثار إعجاب الجميع.

وقال خليفة في منشوره الذي تم تداوله على نطاق واسع :" النهاردة الصبح وانا باخد شاور سريعاً عشان ألحق شغلي ف ميعاده مارية بنتي خبطت عليا عشان توريني الفستان الجديد بتاعها قبل ما تمشي بما إن النهاردة أول يوم لها ف الحضانة بعد الأجازة  .. طلعت من تحت المية وفتحت الباب فتحة صغيرة كده وقولتلها الله جميل يا مارية وقفلت رجعت تاني أكمل الشاور .

سمعتها بتقول لمامتها استني أما أوري الفستان لبابا كويس .. ف أتاري التطبيلة بتاعتي كانت ع عجل كده ومشبعتش منها .. أو يمكن حست إني مكنتش مركز قوي ..

وأنا بصلي جت جنب مني ووقفت تتفرج ع نفسها في المراية .. قولت ف نفسي يولع الشغل مش هتفرق دقيقة تأخير يعني .. وهالله هالله يا ست البنات .. ايه الحلاوة والطعامة والجمال ده .. يا نهار أبيض يا نهار أبيض .. مع وصلة تطبيل محترمة مخدتش مني دقيقة واحدة .. حسيت بعدها إن مارية بنتي وشها نوَّر .. وعرفت إنها مكنتش عاوزه تمشي إلا لما توريني الفستان كويس .. تخيلت إني لو اتسرعت ومشيت بدون ما أقولها الكلام ده كان أكيد هيكون فيه حاجة ناقصاها .

أهي مارية سبحان الله ٥ سنين بس بتحب تسمع كلام حلو وعاوزه اهتمام بجمال لبسها وشعرها .. من أبيها بالذات مش من أمها .. لذلك غازلوا بناتكم مهما كان سنهم .. الكلمة الحلوة منك كأب وكزوج بتنور وش بنتك وزوجتك وبتحميه نفسياً وبتشبعهم عاطفياً .. بتكون سند ليهم وسط انحرافات المجتمع اللي حواليها .. والكلام الحلو والأحضان ببلاش والله .