تداول عدد من رواد موقع التواصل الاجتماعي في بوك، منشورًا كتبه طبيب العظام سعيد خليفة، والذي تحدث عن قصة كفاحه ووصوله إلى مكانة مميزة في عالم الطب بعد سنوات من الفقر والاحتياج، وهي القصة التي اثارت إعجاب الجميع.

وقال خليفة في منشوره :" كل ما الاقي الشيطان بيلعب في قلبي بالعجب أو الغرور، بافتح ألبوم صوري القديمة وبجيب الصورة اللي تحت دي .. كنت متصورها من عشر سنين في دارنا اللي كانت ع الترعة ومبنية بالطوب اللبن ومتلزقة بالطين عشان متقعش .. كان أقصى طموحاتي وقتها إني أقدر اشتري عربية فيات ١٢٨ مستعملة وكنت عايل هم هركنها فين وخايف لتتسرق مني .. ومقدرتش أشتريها أصلاً كمان .

نت مروحتش مصيف ولا مرة في حياتي .. ولا روحت الأهرامات حتى .. ولا عمري أكلت ف مطعم كبير محترم .. لإن ببساطة مكنش فيه فلوس .. واللي باخده من أبويا وقتها كنت بحوشه عشان اتجوز .. خلصت جيش بعدها واشتغلت نايب عظام في مستشفى العجوزة وحوشت من الفتافيت اللي كنا بنقبضها مبلغ للسفر لألمانيا وأبويا ساعدني ف الجواز .. ومن تاني أسبوع بعدها اتخذت قرار السفر بجدية .. عشر شهور بالظبط وكنت ف ألمانيا ..

طبعاً بهدلة ف الأول زي الغربة في أي بلد لكن ربنا بدأ يكرم واحدة واحدة والأمور استقرت وجبت زوجتي كمان .. وبدل حلم العربية الفيات المستعملة اشتريت عربية مرسيدس بي كلاس .. وبدل المصيف اللي مروحتوش ف اسكندرية أو راس البر، بقيت بفضل الله بصيف ف أسبانيا و تركيا وهولندا .. وبدل الأهرامات اللي مزورتهاش، زورت المتاحف في فيينا وبراغ ومايوركا .. وبدل بهدلة الشغل ف العجوزة، شغال في مركز من أكبر مراكز المفاصل المتخصصة بجراحات الركبة والحوض ف أوروبا كلها بفضل الله ..

انت من غير فضل ربنا وتوفيقه ولا شيء حرفياً .. ولازم تحط المعلومة دي قدامك ليل نهار عشان الشيطان ميتملكش من قلبك وتبتدي تنسى نفسك وتنسى انت مين وجاي منين وجيت ازاي أصلاً .. كل ده دنيا فانية وهتموت ف الآخر .. بس قبل ما تموت لازم تسيب أثر".

وأثارت قصة الطبيب إعجاب رواد فيس بوك، الذين علقوا عليها بتعليقات إيجابية منها :" ماشاء الله ربنا يبارك لك...كلامك دا بياكدلى صحة افكارى ان طول ماانت فى مصر مش هتحقق اى حاجة وان السفر والبعد عنها اول خطوة للنجاح"، و" ربنا يزيدك من فضله ياريت شباب كتير تملك منهم الشيطان والغرور بقى من صفاتهم تتعظ وتفهم الدنيا فانيه"، و" والله والله والله .. بكيت من اللي بقرأه ياريت كل اولادنا مثلك .. ياريت ماكنتش الاخلاق وصلتنا للي احنا فيه دلوقتي اسأل الله أن يبارك لك و يوفقك و يزيدك من فضله".