كشف رواد موقع التواصل الاجتماعي فيسبوك، عن حيلة جديدة للتسول يوم بها شخص في محافظة كفر الشيخ، حيث يقف على الطريق ممسكًا بلوحة كًتب عليها "يا أهل الخير استرونا احنا غُرب في الشارع".

البداية كانت حينما نشرت إحدى الصفحات على فيس بوك، صورة للرجل يحمل لافتة، لتطالب المتابعين بتقديم يد العون له وأسرته وحمايتهم من العيش في الشارع، حيث قالت :" يا جماعه الخير الراجل ده و مراته وأولاده قاعدين ف الشارع مش لاقيين مكان يعيشوا فيه ف لو حد يقدر يساعدهم باي حاجه هما بيبقوا قاعدين عند مصنع الطوب اللي عند( الحدود )طريق كفرالشيخ / دسوق".

وبمجرد نشر الصورة، فوجئ الجميع بتعليقات متعددة من أبناء كفر الشيخ يكشفون فيها أن هذا الرجل ما هو إلا متسول مشهور ابتكر هذه الحيلة من أجل جمع الأموال، حيث تحدث بعضهم عن تجاربهم معه.

ومن التعليقات التي كتبها المتابعون :" ناس كتير عرضت عليه المساعده و من زمان يعني بس هو بيتهرب او واخدها شغلانه من الآخر و معروف يعني"، وقال آخر" الراجل ده كان قاعد جمب كوبري القنطره وناس كتير عرضت عليه تساعده وهو هرب وخد العيال والست الي معاه وبقي يغير مكانه شحاته بطريقه جديده"، ورد ثالث "عرضتُ عليه شخصياً عملا ثابتاً بأجر مجزي وسكن بشرط ترك هذا العمل فلم يستجِب فلا تحزن عليه فهي صنعة يتخذها مأرباً لجمع المال ويُغيِّر تواجده من سنوات باستمرار تارة عند معهد الشريف بعد القنطرة البيضاء قبل طريق المحلة وتارة في شارع النبوي المهندس وتارة عند مدخل دسوق".

وتابع أحد رواد فيس بوك :" دا راجل مش منضبط معدي عليه وانا مروح كان بيضرب الأطفال اللي معاه بفتري لدرجه اني كنت عايز أبلغ عنه الشرطه"، وأضاف غيره :" للأسف بقالهم كذا سنه وبيقول الناس عرضت عليهم تسكنهم مرضوش شويه يقعدو عند معهد الشريف شويه يقعدو ع كوبري المرور وشويه عند الإستاد انا بشوفه ع الطريق بقالي اكتر من ٣سنين"، و" طريقة من طرق التسول وله على كده اكتر من سنتين كل شوية على طريق شكل".