طالبت الفنانة لقاء الخميسى، جمهورها باحترام آرائها وأفكارها، مشيرة إلى أن كل فرد لها ثقافته ومعتقداته الشخصية، ولابد من احترامها أو رفضها دون الهجوم. وقالت لقاء الخميسى، خلال فيديو عبر حسابها الشخصى بموقع تبادل الصور والفيديوهات «إنستجرام»: «رجاء من كل الناس اللى بتتابع السوشيال ميديا.. اللى بيحب حد يدخل عنده ويقوله كلمتين حلوين أو يصمت.. مبتحبش متقولش ممكن نختلف فى الآراء، لكن لازم نتعلم إزاى نحترم الاختلاف». وأضافت الخميسي: «ياريت نبطل نهين بعض، ونرفض أفكار بعض، كل واحد زى ما تربى، وكل واحد وثقافته، وكل شخص ليه تفاصيله ومعتقداته وأفكاره وثقافته، فلازم نحترم بعض على قد ما نقدر، ولا يصح أن أهاجم حضرتك.. الحاجة بقت تزهق بصراحة». وأوضحت لقاء الخميسي: «الممثل عنده نفس التفاصيل اللى بتمر بيها.. أزمات نفسية ومادية وعائلية ومشاكل، ومنحبش نوريكوا مشاكلنا.. إحنا موجودين فى الدنيا علشان خاطر نبسطكم ونفرحكم ونقدملكم محتوى يغير مودكم». واختتمت الخميسى، قائلة: «إحنا بنيجى على نفسنا علشان نبسطكم، وبنحب شغلتنا وبنحبكم، فرجاءً حِبونا شوية وادونا هوا، وشوفونا بنى آدمين طبيعيين.. عندنا مشاكل، وصدقونى مفيش حد فى العالم معندوش مشاكل.. كل واحد ربنا بيديله على قد قدراته.. الرحمة حلوة يا جماعة». ودعمت الفنانة بشرى زميلتها الفنانة لقاء الخميسى بعد نشرها فيديو طالبت فيه جمهورها باحترام آرائها وأفكارها. وأعادت بشرى نشر فيديو لقاء الخميسيس، عبر خاصية القصص المصورة الملحقة بحسابها الخاص فى «إنستجرام»، والذى تحدثت فيه عن اختلاف الثقافات، وطلبت من جمهورها احترام آرائها. وعلّقت بشرى على الفيديو قائلةً: «صح يا لقاء كفاية بقى ونرحم بعض شوية، إحنا جزء لا يتجزأ من النسيج الوطنى ومن شعب مصر، يعنى بنمر بنفس اللى أى مواطن بيمر بيه من أزمات، محناش كائنات كرتونية، الفنان نبض المجتمع.