في أحد اللقاءات التلفزيونية الجميلة مع الفنانة دلال عبدالعزيز وكانت معروفة بحبها الشديد لزوجها الفنان سمير غانم رحمة الله عليهما، سئلت عن أكثر موقف غريب جمعهما معا فقالت : "سمير معروف ان هو بينسى يعني ممكن يسألني سؤال مثلا "دلال انتي عملتي ايه في موضوع كذا؟" قبل ما أجاوب عليه يكون مشي وسابني ده العادي بتاعه ففي مرة هو كان شغال مسرح وانا كنت حامل في دنيا وقتها .. انا كنت بزهق من قعدة البيت فكنت باخد بعضي واروح له المسرح ، طبعا هو مكنش بيحب اخرج معاه وانا حامل ، المهم خدت عربيتي ورحت له المسرح وبعد ما خلص قالي تيجي نتعشى برا ، قلتله اوكيه .. فقالي تعالي نركن عربيتك عند البيت وتركبي معايا في عربيتي عشان واحنا راجعين في اخر الليل متبقيش انتي سايقة وترجعي معايا .. خدت بعضي وروحت وركنت عربيتي قدام البيت واستنى سمير بيه مجاش .. راح هو وسهر وطلب واتعشى وعمل كل حاجة لحد ما واحد بيسلم عليه قاله "فين نصك الحلو؟" ، قاله "يا نهار أبيض ده نصي الحلو مستنيني قدام البيت" انا قلقت بقيت عمالة أقول يا ربي طب أرجع بالعربية أشوف لو فيه حاجة حصلت .. لو انا مش فاهماه كويس أوي كنت أزعل طبعا واعملها مشكلة فعشان كده بقيت كل ما أخرج معاه ونروح نحضر فرح او حفلة أوصيه وأقوله "سمير خليك فاكر ان انا معاك وانت مروح اوعى تنساني"