تحدث الفنان أحمد فهمي، عن علاقته بالفنان أكرم حسني، وسفرهما معا في الرحلات، موضحا أن الأخير يسافر معهم حاملا كل شيء من الممكن أن يحتاجه. وقال أحمد فهمي، في تصريحات تليفزيونية: "أكرم حسني بيسافر معانا نويبع، بحاجته كلها، فالعربية الكبيرة اللي بنأجرها دي بقت ضيقة جدا لأنه بيسافر بلحاف ومخدات، ومكتبة يعلق عليها حاجاته، وأباجورات، هو بيحب يتبسط، بيجيب معاه بروجيكتر كل الناس اللي في الكامب بتروح تتفرج عليه ومسمينها (قهوة أكرم)". وأضاف فهمي: "قلنا هناكل فول وطعمية فالراجل بيسألنا يجيب كام فأكرم قال هات أربعينات قلتله يعني إيه ده كده الراجل هيعتزل الفول، إحنا 4 وأكيد معندوش 160 ساندوتش، كان معانا فول وبيض كتير أوي". وتابع: "وقلنا عايزين حاجات من السوبر ماركت أكرم نزل وخرج من السوبر ماركت مش معاه حاجة بنبص لقينا كل موظفين السوبر ماركت خارجين بهوهوز وتوينكز والسوبر ماركت خلص، فبقينا قاعدين مش شايفين بعض من الكاراتين المحطوطة". وعرض مؤخرًا لأحمد فهمي فيلم "عصابة الماكس"، وشاركه البطولة روبي، لبلبة، حاتم صلاح، أوس أوس، ومن تأليف أمجد الشرقاوي ورامي علي، إخراج حسام سليمان. وتدور أحداث فيلم "عصابة الماكس" في إطار كوميدي حول (المكسيكي) الذي اعتاد القيام بعمليات السرقة والتهريب وحده دون مساعدة، ويتورط في عملية كبيرة تحتاج للاستعانة بمجموعة تساعده في تنفيذها، ولكنه يكتشف أن من اختارهم يورطونه في مشاكل تهدد نجاح العملية.