علق الفنان عباس أبوالحسن، عن كثرة وفيات الوسط الفني في الفترة الأخيرة، وذلك بعد رحيل الفنان حسن يوسف، والفنان مصطفى فهمي، ومن قبلهم الكثيرون خلال هذا العام. وكتب «أبوالحسن»، عبر حسابه الرسمي بموقع التواصل الاجتماعي فيسبوك: «كنت برجع في الصفحة بتاعتي بدور على بوست معين كتبته من كذا سنة، اتصدمت لما شفت كم الناس اللي ماتت من الأصحاب الأعزة، والشخصيات العامة، والقامات الفنية، منهم كتير ماتوا ومحصلوش نص متوسط الحياة المفترض، واعتراني إحساسين وفكرتين متناقضين، إزاي إن جميعنا في طابور واحد نقترب من حافة القبور، وإن القدر ممكن، ولأسباب غامضة، يدفع بك في لحظة إلى أول الطابور». وتابع عباس أبوالحسن: «مش لازم تكون مريض بمرض عضّال، أو في حادثة، كتير ماتوا وهمه نايمين، وهمه في الشغل، عندي صديق عزيز مات وهو في الچيم، وصديق عزيز آخر مات وهو في الجو على طيارة هو الكابتن بتاعها، الإحساس الأول إنك لازم تحاول تعيش متسق مع ذاتك، وده يتطلب إنك تعرف نفسك معرفة حقيقية، تستمع بعلاقات حقيقية دافئة مع ناس بتحبهم وبيحبوك، تعيش بشرف، وإنك تدرك إن الشخص الوحيد في الكون اللي يفرق معاك هو شايفك أزاي هو إنت، وإنك تعيش من اجل غرض ما الأفضل أنه يكون غرض نبيل، أن مافيش حد مشي في رحاب القطيع، وكان متحقق وراضي وفي سلام مع نفسه، وإن الحياة فعلا قصيرة وعبثية، وإن الحياة لا تقاس بالنجاح وإلا مكانش فيه مشاهير وعظماء وأساطير انتحروا دون سابق إنذار». واستكمل عباس أبوالحسن حديثه: «الحياة في الحقيقة تُقاس بعدد التجارب الحياتية اللي انت عشتها بشغف وبكلك الحاجة التانية؛ انك تدرك أن الفناء قادم لا محالة وبدون انذار، وان الكفن مالوش جيوب، وان فجأة وانا أعني فجاة، هتصحى يوم تكتشف فيه أن الحياة مبقتش قدامك».