تصدرت أغنية «لعبتك» للمطرب أحمد كامل، التريند رقم واحد، عبر موقع نشر الفيديوهات العالمي «يوتيوب»، حيث حققت نجاحًا كبيرًا ووصلت نسبة مشاهدتها نحو مليون و492 ألف عبر يويتوب، وذلك بعد ثلاث أيام من طرحها.

«لعبتك» من غناء وألحان أحمد كامل، كلمات مصطفى ناصر، وتوزيع إسلام الأزرق، وظهر كامل في الأغنية من خلال قصة درامية بين شاب وفتاة وهو يواجهها بخطاياها تجاه قصة حبهما.

وكان أحمد كامل كشف عن الصعاب التي مر بها في بداية مشواره الفني، عبر حسابه على موقع التواصل الاجتماعي «فيسبوك».

وكتب أحمد كامل: «أنا فاكر كل حاجة زي ما تكون حصلت النهاردة.. فاكر لما اسمي اتكتب في ورك شوب بالغلط علشان أتعلم غناء مع إني كنت في البروجيكت، وأنا رابر، ومعرفش هدخل أعمل إيه وهغني إزاي.. فاكر أول محاولة إني أغني، وكل الناس معترضة ورفضاني، وبيتريقوا على اللي ضيعت عمري فيه».

وتابع أحمد كامل: «فاكر لما سقطت في الجامعة 8 سنين وصحابي كانوا بيعايروني علشان اتخرجوا واشتغلوا وأنا صايع ولسة بسقط، وكانوا بعيد على طول السنين وافتكروني مؤخرًا لما بقيت عايش بالنسبالهم، أنا فاكر كل كلمة وكل كسرة وكل ليلة نمت فيها محروق دمي من كلام اتقالي، أو ضحكة خبيثة بتقلل مني وسط الكلام، أو من كلمة غنيلنا يا فنان بتريقة».

وأضاف المطرب: «فاكر لما سبت بيت أبويا وأمي اللي قادرين يصرفوا عليا مال الدنيا ومن غير دعمهم مكنتش بقيت هنا، وكان حلمي أني أشرفهم علشان مبقاش العيل الخايب اللي في العيلة، وقعدت سنين بعيد عن البيت لحد ما رجعت أحمد كامل الحالي علشان اخترت طريقي بنفسي، ولازم اتحمل العواقب، كنت دايمًا خايف علشان مكبرش قدام أخواتي الصغيرين، وأشوفهم واخدين حد غيري قدوة أو مسنودين على غيري وأنا عاجز».

واستكمل «كامل»، قائلًا: «والله أنا فاكر كل ليلة من غير عشا وكل ليلة عياط وفقدان أمل، وفاكر كل فرحة فرحتها، وكل تعب وكل مقابل بعد مجهود، وكل كلمة كتبتها في أغنية، وكانت من كل قلبي حتى لو صوتي مكانش أحسن حاجة، بس كنت بقول أكيد مش هتخلص على مفيش، فاكر اللي كانوا بيستعروا مني علشان تافه في نظرهم، ودلوقتي ناقص يرسموا صوري على صدرهم، وفاكر اللي ساعدوني وفاكر اللي خذلوني.. فاكر شركات إنتاج روحتلهم بـ أغاني ومش عايز أي مقابل».

واختتم قائلًا: «بس يساعدوني اتعرف واتريقوا عليا ورفضوني.. من وأنا عيل صغير مفيش شيء يحركني قد الغل أو أن حد يستضعفني علشان أنا عارف نفسي كويس، وعارف قدراتي.. هفضل لآخر يوم في عمري بحاول أثبت نفسي كل يوم وأتعلم وأتطور، وعدت نفسي في يوم وأنا بعيط لوحدي من الحسرة أني ورب الكون ما هخاف أبدًا من بكرة، ومن ساعتها ومادخلش قلبي خوف.. أنا فاكر ومش هنسى.. اللهم لك الحمد والشكر».