أعلنت الإعلامية لميس سلامة، عن إصابتها بفيروس كورونا، عبر حسابها الرسمية بموقع التواصل الاجتماعي «فيسبوك». 

وكتبت لميس سلامة، قائلة: «كورونا إيجابي وعرفت متأخر بعد ما وصلت للرئة، لكن الحمدلله، أنا بقالي أسبوع تعبانة تعب لا يحتمل، والحديد وصل لـ3، وكل شوية نجري على مستشفى شكل عشان بدوخ وبفقد الوعي وتعب رهيب، وعملت خمس مسحات وطلعوا سلبي، وعملت كل التحاليل عشان نعرف دي كورونا ولا لأ، وكل الناس قالولي مش كورونا، وفي يوم روحت السعودي الألماني قولتلهم احجزوني الحقوني عالجوني أنا بطلع في الروح، قالولي مانتي مش كورونا».

وتابعت: «عملت إكو على القلب من التعب، وبرضه مظهرش حاجة، وبعدين في عز مانا بطلع في الروح قولتلهم لبسوني وودوني أعمل مقطعية ع الصدر.. واحنا بنحجز قالولي إحنا عاملين عرض على المقطعية مع المسحة مع بعض، قولتلهم اعملوها مش هنخسر حاجة». 

وأضافت: «طلعت إيجابي ودخلت على الرئة وبانت في المقطعية.. الحمدلله بدأت العلاج وإن شاء الله خير، دعواتكم عشان أنا شوفت أصعب أيام حياتي، وكنت حاسة إن أنا حقيقي بموت، قعدت أدعي ربنا يخليني بس لبنتي».