حرص بعض نجوم الفن في مصر والعالم العربي على توجيه رسائل إلى خريجي الثانوية العامة، عقب ظهور النتيجة مباشرة، وما بين التحفيز والمباركة والتوبيخ، تعددت رسائل هؤلاء النجوم، لذا يرصدها "الهلال اليوم" في السطور التالية.
“أوعى الإحباط يلعب الدنيئة معاك”
وجّه الفنان عمرو يوسف رسالة للطلاب الناجحين في مرحلة الثانوية العامة، عبر حسابه على موقع التواصل الاجتماعي "فيسبوك"، قائلا: "ألف مبروك لكل اللي نجحوا في الثانوية العامة، وإن شاء الله تحققوا أحلامكم ومستقبلكم اللي رسمتوه بأيديكم، مفيش حاجة سهلة، بس كمان مفيش حاجة مستحيلة، واللي محققش حلمه السنة دي حاول هتقدر، بس أوعى الإحباط يلعب الدنيئة معاك".
“بلاش ضغط دي مش نهاية الحياة”
كما وجهت الفنانة فيفي عبده رسالة لطلاب الثانوية العامة، عبر حسابها على موقع "فيسبوك”، قائلة فيها: "أخباركم إيه يا بتوع الثانوية العامة، يا رب بالتوفيق يا رب وبلاش ضغط، دي مرحلة في الحياة مش نهاية الحياة".
“ ياما ناس نجحت في حياتها أكتر من دراستها”
ووجّه المطرب أحمد جمال رسالة لطلاب الثانوية عبر حسابه على «فيسبوك»، قال فيها: «بالنسبة للناس اللي جابت مجموع كبير في الثانوية العامة مليون مبروك، أنت كده ابتديت أول خطوة في مشوار حياتك بس لازم تكمل بنفس الطاقة اللى عندك دي عشان متهدش اللي بنيته».
وأضاف: «أما بالنسبة للي جاب مجموع مش عاجبه أو مكانش متوقعه صدقني دي مش نهاية الكون، ياما ناس نجحت في حياتها أكتر من ناس نجحت في دراستها، وناس قدرت تنجح في مجالات غير مجال دراستها تمامًا، نتيجة أنها قدرت تشغل دماغها كويس مع شوية مجهود».
وتابع: «في النهاية افتكر كويس أن ده نصيبك وده اللي ربنا اختارهولك وربنا مبيختارش إلا الخير، بس أنت مش عارف أهم نصيحة هقولهالك متضيعش وقت، حتى لو دخلت كلية مبتحبهاش، دور وفكر هتعمل إيه جنب دراستك، عشان يكون ليك كيان كبير في المستقبل، استغل كل دقيقة أنت عايشها دلوقتي في حاجة مفيدة عشان هتعرف قيمتها بعدين».
ساندي “هتقضي” يوم كامل مع الأول
وأطلقت الفنانة ساندى مبادرة تحفيز لطلاب الثانوية العامة، وبثت فيديو عبر صفحتها الرسمية على موقع التواصل الاجتماعى «فيسبوك» لتشجيع الطلاب، ووعدت بالخروج مع الأول على الثانوية العامة وقضاء يوم كامل معه.
ظافر العابدين: الأولى “هخرج معاها يوم”
ومن جانبه وجه الفنان ظافر العابدين رسالة مختلفة أيضًا لطلاب الثانوية العامة، وأعلن أنه سيخرج مع الطالبة الأولى على الجمهورية قائلًا: «أنا لسة عند وعدى الطالبة اللى هتطلع الأولى على الجمهورية هخرج معاها يوم بجد».
“ياريتكوا ما ذاكرتوا”
أما الراقصة سما المصري، فسلكت طريقًا مغايرًا تمامًا، حيث وجهت عبر صفحتها بموقع الصور الشهير "إنستجرام" رسالة لطلاب الثانوية العامة.
وقالت المصري في رسالتها: "ياريتكوا ما ذاكرتوا.. أقصد طبعا الطلاب اللي رسبوا السنة دي، ياريتكوا فعلا ماذاكرتوش، وكنتوا ضيعتوا وقتكم في حاجة مفيدة، لأنكم أكيد ذاكرتوا زي ما كنا كلنا بنعمل في الثانوية العامة، ونذاكر قبل الامتحان بكام يوم فلازم طبعا تسقطوا".
وأضافت المصري: "لو كنتوا ركزتوا في الدراسة من أول السنة ما بدأت ماكنتوش حصل معاكوا كده… معلش أنا عندي حد في العيلة سقط في الثانوية، والرسالة دي موجهة له “جتك خيبه اتنيل” اللي ذاكر ذاكر من بدري.. واللي نجحوا ألف ترليون مبروك.. طب وهندسة والسن وإعلام وكده.. وخصوصا بتوع الإعلام.. مستنياكوا معايا".
