احتلت الفنانة فريدة سيف النصر مكانة في مؤشرات البحث بـ"جوجل"، وذلك بعد تصريحاتها حول هجوم البعض على الوسط الفني.
وكانت فريدة سيف النصر نشرت صورة أمس الخميس عبر صفحتها الرسمية بموقع تبادل الصور والفيديوهات "إنستجرام"، وعلقت عليها قائلة: "أنا زعلانة علينا كلنا أوي.. المصريين أحلى وأطيب وأجدع من كده بكتير. خفة دم وكرم وذوق".
وأضافت فريدة سيف النصر: "ليه بنستخبى ورا شاشات وننزل ننحر رقاب بعض.. الكلمة القاسية بتذبح.. بقينا نكديين مانعرفش نفرق بين جد وهزار كله عايز يتخانق مع كله.. أيه ده.. وكل يوم يعاملوك بوش أو حسب المصلحة.. في أيه.. بعض الناس ماسكين الفنانين وكأن في تار بلا أسباب.. دي عجزت ودي كرمشت ودي غيرت دينها وده دمه تقيل وده كبر في السن لكن بيغني. وده بيرقص كونغرو.. وده اتكسح ودي روحي موتي".
وتابعت فريدة سيف النصر: "كفاية عيب بتقولوا كده لأهاليكم.. ما كل العالم وأنتم بعدين لازم تكبروا دي سنة الحياة.. مالكم في أيه بجد.. هما الناس دي ما أسعدكمش أعمالهم فترات من الزمن.. طيب بلاش أنت ما بتحبوش فلان غيرك بيحبه.. في أيه.. يا جماعة تحسوا مخطط لهدم الفنانين القوى الناعمة اللي فاتحين بيوت أربعتاشر مليون.. متخيلين كل المهن شغالة معانا تحت إيديهم كام عامل وأسطى كل واحد فيهم عنده أهل وزوجة وأطفال وفي اللي جوز ولاده وعندهم بيوت مفتوحة".
واستطردت فريدة سيف النصر: "بتحاربوا تمن عدد البلد في أكل عيشهم.. اقرأوا كده المسلسل بيتكتب ناس قد أيه عماله في كل المجالات من أول مؤلف لحد السواقين في العمل.. مسلسل واحد ممكن يشغل خمسة آلاف حد مش هزار.. شوفوا الأسماء وقولولي.. كفاية هد في الفن.. الوحش انقدوه بأدب والكويس شجعوه.. إنما تهزأوا فنانين كبار ليه يعني.. علي فكرة أنا عارفه انها لجان مستهدفه الفن المصري.. والفن عمومًا ما هو العربي بيصب هنا.. هاه قررتوا أيه.. هانشتم من ورا الشاشة ولا هانقول كلام نصح حلو يا باشا".