كشف الإعلامى أحمد شوبير، عن أن محمد مجدى أفشة، لاعب النادى الأهلى، أكد له رفضه الرحيل عن الفريق حال رفض المسئولين العرض التركى.

وقال شوبير فى برنامجه الإذاعى عبر أون سبورت إف إم: "أفشة اتصل بى وقالى ليا عتاب عندك يا كابتن، أنت قولت إنى اتأخرت فى إجراء جراحة فتق البطن، وأنا هشرحلك الأسباب، كان عندى فتق يمين قبل ما أجى الأهلى وعملته، وبعدها جالى الفتق الشمال، وبلعب بقالى 5 شهور وأنا بتقطع ومقدرش أفتح بوقى عشان الظروف اللى فيها الأهلى، وبقالى 3 سنين مخدتش إجازة فقلت أخد إجازة 15 يوم وبعدين أعمل العملية، وده اللى حصل، وهفك السلك النهارده، وابدأ الجرى من بكره بشكل عادى".
 
وأوضح: "أفشة قالى إن فيه عرض تركى بالفعل وكيله بيتناقش فيه مع مسئولي الأهلى، بس لو الأهلى رفض قالى نصا مقدرش أقول للأهلى لأ أنا كنت عندك في برنامجك وقولتلك حلمى أنى ألعب في الأهلى، لكن لو الأهلى رحب بالعرض يبقى لازم أشوف أكل عيشى".
 
وأكد شوبير: "أفشة قالى أبويا بيخاصمنى لما الأهلى بيخسر وبيكون يوم نكد علينا كلنا، ولمحلى أن ممكن يكون في تمديد لعقده مع الأهلى الفترة الجاية".