حرص الفنان أشرف عبد الباقي علي إستعاد ذكرياته مع الفنان الراحل علاء ولي الدين لإحياء ذكرى وفاته.
ونشر عبد الباقي عبر صفحته الرسمية لموقع تبادل الصور والفيديوهات "إنستجرام": " ربنا يرحمك ياعلاء.. زي النهاردة من عشرين سنة أتوفي علاء ربنا يرحمه ويغفر له يارب وبرغم أن فات عشرين سنة علي وفاته لكنه كان ومازال اقرب صديق ليا"
تابع أشرف: "أول مرة أطلع عمرة كان معاه واحنا رايحين الكعبة قاللي بص في الأرض لغاية ما نوصل والكعبة تبقي باينة وأقولك بص وادعي ويمكن الحكاية دي بقيت اعملها مع أي حد يعمل عمرة لأول مرة وادعي لعلاء.. في حياته كنت بشوف الخير اللي بيعمله مع ناس كتير وأتعلم منه بشكل مباشر وغير مباشر".
وأستكمل: علاقتنا كانت اكثر من أخوات ومن خلاله كنت أشوف باقي أصحابنا لأنه كان كريم جدا ومضياف جدا وفي بيته كنت أحس اني في بيتي وان والدته الله يرحمها مثل والدتي اللي أتوفت وانا في سن صغير.. وخالد اخوه الله يرحمه ومعتز ربنا يكرمه ويخليه لأولاده زي أخواتي عندما كنت احس اني متضايق أروحله أتكلم معاه وارتاح.. لم يعدي يوم إلا عندما نتقابل أو نتكلم في التليفون نعرف أخبار بعض".
وأختتم أشرف عبد الباقي" يصادف يوم وفاته أول يوم عيد الأضحى وبعد ماوقف علي الأضحية أتوفي وكنا علي ميعاد يومها في المسرح لعرض مسرحية "لما بابا ينام" اللي انتهت بوفاته.. ربنا يرحمك ياعلاء ويصبر اهلك وأصحابك اللي أكيد مادام عرفوك عمرهم ماهينسو.
ويصادف اليوم ذكرى وفاة النجم الراحل علاء ولي الدين وكان من أبرز نجوم الكوميديا في مصر وقدم العديد من الأدوار البارزة والأعمال التي أحبها الكثيرين منها "فيلم الناظر" و"عبود على الحدود" و"ابن عز"، وتوفي عن عمر يناهز التاسعة والثلاثون عاما بسبب مضاعفات مرض السكري.