بقلم – سليمان عبدالعظيم
بجد بجد.. أنا خايف الوزيرة الدكتورة سحر نصر تتحسد على نشاطها الملحوظ وإنجازاتها اللى كل مصرى شايفها وحاسس بيها.. اللهم صل على النبى.. زيدوا النبى صلاة.. الست الوزيرة واخدة مصر «كعب داير» من يوم ما اتعينت وزيرة للاستثمار
لما يكون الإنسان فى وشه القبول الصعاب بتضيع والحلول بتظهر وتبان.. وده اللى حصل مع الوزيرة سحر.. النصر كان حليفها فى مفاوضاتها المكوكية للحصول على قروض ومنح وهبات من مؤسسات التمويل الدولية.. مليارات الدولارات جابتها الوزيرة، لأن فى وشها القبول وفى كلامها الصدق وفى مذكراتها الموضوعية التامة.. لأنها.. ولأنهم أيضاً، أقصد البنك الدولى وصندوق النقد الدولى عارفين ومتأكدين أن الاقتصاد ليس فيه كلام مثل السياسة.. المصالح بتتصالح.. اللى بيدى القرض عارف أنه هايستفيد.. واحنا كمان هانستفيد المصالح لما بتتصالح تبقى الدنيا حلوة وخايف أقول: بتبقى الدنيا ربيع!.
منذ أن تسلمت منصب وزيرة الاستثمار قطعت سحر نصر عشرات آلاف الكيلومترات.. فى أمريكا نزلت مرة ومرات.. وكذلك الحال فى معظم عواصم المال والأعمال.. لندن.. باريس.. اليابان.. الصين.. السعودية والإمارات والكويت.. لفت العالم كعب داير طوال الـ٢٤ شهراً الماضية تبحث عن رءوس أموال تدخلها البلد اللى خرج مأزوماً بسبب اللى مايتسماش الربيع العربى اللى ماكانش أبداً ربيع.. وكان «غربى» مش عربى!.
قبل سحر نصر الناس وقبلهم طبعاً المستثمرين هاجموا وانتقدوا وزراء الاستثمار السابقين، لأن قانون الاستثمار الجديد ماطلعش والدنيا بقت سايبة وكل يومين ثلاثة الحكومة تقول القانون هايطلع خلال أيام..!
الوضع ده لا يجب أن يستمر.. هكذا قررت الدكتورة سحر نصر.. اشتغلت على مواد القانون الجديد.. سمعت المستثمرين بيشتكوا من إيه فى حوارات وجلسات مفتوحة ومغلقة، عرفت إيه هو المطلوب من الحكومة.. ونفذته.. ولما ده حصل، المستثمرون والحكومة بقوا سمن على عسل.. وده طبعاً لصالح الناس الغلابة اللى مش لاقيين فرصة عمل ولا لقمة عيش كريمة!.
الوزيرة الشغالة عندها حس سياسى رفيع المستوى.. من كام يوم طلعت على سيناء.. ورغم حرارة شهر أغسطس القاسية جدا صممت سحر نصر أن تتفقد أحوال أول مزرعة حيوانية فى طور سيناء (٣٠ فداناً) تضم ٦٠٠٠ رأس ماشية تسمين، وسيتم توسيعها حسبما وعدت اللواء خالد فودة محافظ جنوب سيناء لتضم ٢٠ ألف رأس تسمين فى العام المقبل، وهذا سوف يسمح بتشغيل ٧٥٠ من شباب سيناء، خاصة البدو لأول مرة!.. الله ينور عليك يا دكتورة سحر.. لولا التمويل اللى حصلت عليه (٥٠ مليون جنيه) ماكانش فيه مزرعة حيوانية ولا دياولو.
تصوروا المزرعة أنتجت حتى الآن ١٥ ألف حيوان تسمين اتباعوا فى السوق لحوماً حمراء.. أمال سعر اللحمة عمال بيزيد ليه؟!
ومن المزرعة الوزيرة سحر.. طلعت عدل على جامعة الملك سلمان بن عبدالعزيز فى ثلاث مدن هى مدينة الطور «٣ كليات»، وكليتان فى رأس سدر وسكن خاص للطلاب، بينما ستكون كليات الألسن واللغات والسياحة والفنادق فى شرم الشيخ التى وفرت لها تمويلاً قدره ٢٥٠ مليون دولار.. اضرب أنت الدولار بـ ١٨ جنيهًا.. شوف الوزيرة جابت كام!..
فى حل مشاكل الاستثمار والمستثمرين لا تكل سحر نصر ولا تمل .. حرصها كبير فى هذا الأمر.. فى جولة سيناء كان معها «منى زوبع» الرئيس التنفيذى للهيئة العامة للاستثمار.. عشان لو أى مستثمر طرح مشكلة تتحل فى التو واللحظة.. ودون إبطاء..
وزيرة شاطرة وواعية وماسكة أهم ملف فى البلد.. الله يسعدك يا دكتورة سحر.
د. سحر.. الله يعمر بيتك زى مابتعمرى بيوت ملايين المصريين الشقيانين.. قولوا معايا.. آمين.